My bad wards now is out of area


بناءاً على طلب بعض الناس اننا امسح الكلام اللي كان هنا فا انا مسحته علشان الشكل العام للبلوجايه


انا في البوست ده هحط شعر ليا برضه كالعاده وده اخر شعر


الشعر ده كان جزئين جزء حلو والتاني كئيب انا شلت الجزء الكئيب وهنزلكم في اخر شعر


الحبه اللي مش كئيبين كنوع من الفرح





انت حورية



تـمكـن الحــب مــن قـلـبي..... وطـالعتـنـي بـعيـونـهـا البـراقه




نظـرة عــين فــخفـقـة قـلـب.... وكـأن ضـيها لحـياتي اشـراقه




رقيقة اللمسات تهوى الهمس.... وكأنهـا تخشـى للطيـور إفـاقة




عين عسليـه كلئاليئ ذهبية.... للجـمال والـرقة هـي السـباقه




ليـسـت جـمـيله بـل حـورية.... رحيـق عطر للحــياة منسـاقه




انحـنـيـت انـتـقـي لـهـا وردة.... فتجملت الورود وهي مشتاقه




لا اجـد في الـبسـتـان وردة..... تضاهي مابهــــا مـن انـــاقه



خلاص ده الجزء الجميل من الشعر او الجزء الفرايحي على رأي بعض الناس
سلام

لن أعود حبيبتي


بقالي اسبوع كده كل ماافتح بلوجاية أي حد لازم والاقي فيها اي حاجة عن الناس وجرح الناس وظلم الناس ومش عارف ايه عن الناس


قلت اشمعنا مصر كلها بتكتب عن جرح الناس وانا لا ""شوفو العقلية الطفولية"" لازم اكتب انا كمان


بس اانا مش هكتب عن الجرح انا تقريبا كده كاتب حاجة عن الظلم


لإن فعلا ساعات الواحد بيجرح حد وفي الاخر يندم قوي قوي قوي وييجي يصلح اللي فات بس للأسف يلاقي الوقت متأخر قوي


ولو اتخصصنا وسبنا الناس كلهم "شفتو انا كريم ازاي" هنلاقي الموضوع ده موجود حتى بين الحبيب وحبيبته


واحد فيهم يجرح التاني ويقول طز وبعد اربع بتاع 3 تيام ونص كده تلاقيه ندمان


ونفسه حبيبه لو يرجعله زي الزمان والمية تعود لمجاريها


وساعات الواد بيبأه عامل فيها عمونا روميو ويقول انا بكره هروح اقول لها ان انا بحبها


تاني يوم ييجي عمونا روميو وطبعاً بعد مايرتبك شوية وركبه تخبط في بعضها وفي الاخر يقول لها


التانية يااما هتوافق وده مش موضوعنا يااما هترفض وتقول له خلينا اخوات وده مش موضوعنا برضه


يااما هتقول له انته ازاي تفكر في حاجة زي دي انته اتجننت وحاجات زي دي


وفي الحاله دي الواد نفسه عزيزه عليه هوه فعلا كان بيحبها "" بغض النظر عن وما بعد الحب ومش عارف ايه اتكلمت عنه في بوست قبل ده "" فهيمشي مجروح ويحس الدنيا كلها بقت عبارة عن نص متر في نص متر يعني حتى متكفيهوش ويشتم نفسه ويضرب نفسه على انه فكر يقول لها


اما بالنسبه للبنت فتمشي تكلم نفسها

ازاي يفكر في حاجة زي دي ده اكيد مجنون بس المشكلة اننا برضه بحبه وبكده ضيعت كل حاجة من اديا وكلمه من قلبها ورد من عقلها وشوية وشوية تلاقي نفسها قدام حيطة سد فطبعا هترجع


بس هترجع ايه اكيد بعد فوات الاوان"طبعا احنا بنتكلم عن الشباب اللي عندها كرامه في النقطه دي " و

تيجي تقول له نرجع يكون التاني مش طايقها ومش طايق سيرتها واسفها عنده مش مقبول بالمرة


وطبعا انا مش هطول اكتر من كده لإن الموضوع ميستاهلش اكتر من كده كلام كله عارف الباقي


ندخل بأه في الشعر اللي في البوست ده وشوفوا انا هقول لكم حاجة مختلفه

بجد مش عارف مختلفه في ايه بس انا حاسسها مختلفه
وياريت اللي يقرا يقول رأيه لإن انا فعلا مش فاتح الشعر ده سبيل انا برضى بكل الاراء وموافق عليها وانا بتعلم من
رأيكم في شعري

وانتم اللي هتساعدوني اعرف انا مختلف في ايه



-- لن اعود حبيبتي --

------------------------------------------------------


حبيبتي حرمتني حنانك *** زعمتي حبنا كان ارتجال



حبيبي حقاً احببتك *** ورجوعنا حبيبتي عين المحال



حبيبتي فلتغمضي جفنك *** فلربما نلتقي في الخيال



او ربما يرسمنا قلبك *** بشاطيء الحب أعلى الرمال



حلمت بمنزل بفؤادك *** وأرغمتني أنت على الترحال



كم كان ثمين حبك *** نجم منير صعب المنال



وكم أصبح ذليل عشقك *** ثمن بكاء عيوني ليال



عودتي ليست تحت طوعك *** لست أُملَك حبيبتي بالأموال ==> انا اللي بتملك يعني



أعلم كم أُهيم بوجهك *** ولكن جرحك فاق الاحتمال



الذنب يافتاة هوه ذنبك *** تصورتني صلب كالجبال



لن أعود لقصر قلبك *** ولا تعبثي حبيبتي بالآمال



أفرطت لشعري في وصفك *** وكم انتظرت "" أتحبني؟"" سؤال



وكم تماديت حبيبتي بظلمك *** ودموع عيني كانت تسال


حان وقت تركك وحدك *** سيرضيني رؤية دموعك تنهال


-------------------------------------------------------

وصايا ماقبل الموت




ياجماعه ياللي عاوزين تقرولي انا عارف ان البوست ده هيبأه تقيل عليكم قوي قوي وانا هلتزم بقول الناس لازم تقصر علشان كده انا مش هكتب موضوع وهلتزم بقول صاحبي لازم تورينا الحزين بس اللي عاوز اقوله ان الشعر ده فيه ورا الكلام كلام وكان عندي افكار اضيفها ياما للشعر ده بس مقدرتش بصراحه لإنكم متتصوروش وانا بكتبه قلبي كان بيتنفض ازاي وبأمانه في مرات كتير كنت همسك الورقه واقطعها بس في الاخر تصعب عليا نفسي






عموما انا هقول الشعر وارجوا اي حد يدخل مش يدخل يقرا وخلاص انا عاوز اعرف ارائكم لإن انا وريته لناس قالو حلو وناس قالو كئيب جدا ولازم يتقطع وبصراحه انا مكنتش عاوز انزله على البلوجايه بس ده اللي حصل



عموما نبدأ






أخر حوار او نقدر نقول وصايا ماقبل الموت

-------------------------------------

وهمست حبيبتي


رقة قولها تبكيني في انهيار....... وما أغبى العين ماأبكاها



تنظر حبيبتي بانكسار....... تحاورني أميرتي بعيناها



تحاورني لكنه اخر حوار....... تحاورني مرتعشة يداها



"حبيبي بيننا عشق دار....... ودموعي داء انت دواها"



"سأتركك حبيبي في مرار....... حبيبتك يجب ان تنساها"



"واريدك دوماً في انتصار....... جنتك نفسك يجب رضاها"



"لا تكن حبيبي مثل البحار..... موجة تغضب لمداعبة هواها"



" فا اقطف حبيبي احلى الثمار..... وابحث لنفسك عن سماها"



وفجأة توقف بيننا الحوار....... واقتربت يدي تغلق جفناها



رحلت في نعش تحت الغبار....... كم تشتاق روحي للقياها



رحلت وتركت ليا الدار....... وتركت لقلبي روحها وهواها



رحيلها يذيقني حقاً مرار....... حبيبتي عشقي لن انساها


-----------------------------------------------------------

ياجماعه انا بجد عاوز اقول ان اي حد قرأ الشعر وتوهم انه فهمه ده مش حقيقي لإن للأسف محدش هيفهم الكلام اللي وراه غيري انا


عموما انا مستني اشوف ارائكم وخصوصا رأيك يامحمود لإني في اوزان وقوافي ضاعت مني والشعر محتاج شوية تظبيط وانا بصراحه وبكل امانه متأثر جدا بيه ومش قادر اعدل فيه حاجة

king mody: حديث الروح

من كتر ابداعاتك مستحيل هحصيها
ده شعر ياشاعر الروح ومعانيها
دي تحفه اكيد والحزن فاض بيها
دموعك لئاليء تنور للقلوب مجاريها
وليه ياابني افراحك دايما ناسيها
دي دنيا من الدناوة خداعه اراضيها
سيبها للكفره عشاقها ومحبيها
والامك ياحبيبي بااستيكتك امحيها
وافراحك رحلها مش من بعيد تناديها
اهم حاجة قلبك ونفسك دايما تراضيها
وبرضه هقرالك ولو روحي رايحه لفانيها
ياصاحبي دي عشره سنين بلياليها
ليالينا اللي ياما دبت انا فيها
ولو جرحتني
أيامي معاك عمري ماهندم عليها


"اهداء الى اخويا محمود"


king mody: حديث الروح

أجيبيني حبيبتي


!! حبيبتي

كلمة عندما اقولها تكونين سكنتي فؤادي ملكتي عواطفي

عندما اقولها يصحو الحب و يرقص القلب وينهار فيا الصبر


!! ماذا اقول لك حبيبتي

أقول ان رؤياكي تشفيني وان بعينيك تسحريني وانك دوماً تهزميني

اقول بأنك حبي الوحيد وصبري المديد وأني معك أكون سعيد


!! كيف اقاوم هواك حبيبتي

عيناك قمرليا في ظلامي صوتك غناء ليا في ضجري قلبك قصر ليا عند طردي

سعادتك حلم أحلم به وهواك واقع احيى فيه ولقائك عشق اسعى اليه




ساعات الحب بيبأه مجرد نزوة وهتعدي وده مش ساعات ده غالباً وبيكون الواحد حاسس بكده

بس دوما خوفه ان ده ممكن يكون حب فعلا ويقول لعقله (( لا ياعم ده انا حتى بخاف عليها)) ده مش معناه ان ده حب
الانسان دوما مع العشرة بيخاف على اللي بيعاشره حتى لو مكنش حد في باله (( ده طبعا مش في مصر)) فما بالك حد في باله


الخلاصه ان لازم الانسان يتأنى في موضوع الحب ده جدا ومش اي نزوة خلاص بقت حب والانسان هيموت لو الحب ده فشل



طيب وساعات الحب بيكون حب حقيقي فعلا وده غالبا بيكون شعور عمر الواحد ماحسه قبل كده
لدرجة انه بيشوف حبيبته ومش بيشوف حد حوليها حتى في وسط الزحمه
بيشوفها من هنا وبيحلم من هنا ((مش بيحلم معناه انه بينام وبيحلم لا معناه ان من توهته كإنه بيحلم ..... ركزوا شوية)) وبيحس ان قلبه بيدق بمعدل فوق الطبيعي وان من قوة دقته بترجه رج
وياعيني بأه لو كلمته كمان بيبأه هيعيط خلاص قدامها اما لو ضحكتله فهوه بيعيط فعلا وبيتمنى الارض لو تتشق وتبلعه
وده غالبا نادر في حياتنا اللي احنا عايشينها لكن احنا عايشين علشان نأمل وده حالنا احنا المصريين اكتر من غيرنا

بنأمل الحب وبنأمل نعيش في سعاده وبنأمل حال بلدنا يتغير ونحس بالنظافه مرة بأه

نفسنا الدولة تطلع قرار بسفلتة الشوارع كلها سفلته نظيفه و جاربج نحط فيها الزباله في كل حتة زي البلاد النظيفه وتطلع لنا قرار ان جميع العربيات المصنعه قبل سنة 99 متشتغلش تاني واصحابها ياخدوا تعويض (( والله ساعتها هكون اول واحد رامي عربيته )) ويقولوا ان اللي كان عايش على تاكسي هيشغلوه في هيئة النقل العام بعد ماتنضف ويبأه ليها خط سير محدد وينظفوا السواقين ويبأه ليها محطات نظيفه وعربيات نظيفه وأوقات تعدي فيها زي أي دوله محترمة في العالم نفسنا ندخل الاتوبيس نلاقي الماكينة اللي بتاخد الفلوس اوتوماتك وتطلع لك التذكرة زي اي بلد محترمه برده نفسنا ياخدوا العلماء في الهندسة ويفتحولهم مصانع وقولولهم طلباتكم اوامر من الرئيس شخصيا زي ماعمل رئيس دوله مش فاكرها والله ساعتها الناس دول هيبدعوا مش بعيد يطلعوا عربيات احسن من شركة بي ام دبليو لإن دماغ المصريين عالية والله بس محدش حاسس بيها نفسنا يفتحوا مستشفيات للدكاترة نظيفه و تكنولوجيا عالية ويدو الدكاترة حقهم علشان ميطلعوش يسرقوا بره (( وبمناسبة السرقه نفسنا السارق فعلا تقطع ايده علشان ميسرقش تاني بأه)) نفسنا المدرسين يعلمو في المدرسة مش في البيوت بأه وده مش هيحصل غير لما ياخدوا حقهم الطبيعي اللي يعيشهم بيه والمدارس تكون نظيفه


الحاجات دي سهله والله لكن نقول ايه بأه منهم لله
وجت ايام قالوا عليها انتخابيه
قلت طبعا بلدنا دي ديموقراطية
واتاري ملناش حق في البلد ديه
وقالوا اللي هينافق ملهوش عندنا ديه
دمت يابلدي عزيزة مصرية عربية

لا ذهبيه ولا برونزية خلاص مصر العشرومية
اللي مسكوكي يابلد عالم مفترية
لكن مش هنتكلم مع العالم البلطجيه
واخرنا نغني تحت السجر وناكل اكله هنية
وفي الاخر نتلب على قفانا ودي احلى هدية

طبعا الكلام ده مقتبس (مش مقتبس انا كاتبه علشان انرفز شريف على اللي بيعمله فيا وانا بعتبرها اقتباس او سرقه للفكر بتاع الخماسيات علشان كده انا حاولت احرف فيها شوية لكن يستاهل) ومعلش ياشريف امشي على اخر جملتين في الخماسية
انا خرجت بره الموضوع لكن بجد حال بلدنا مؤسف جدا جدا

والحل سهل وكل يوم بنستنا جديد ومفيش جديد


عموما انا هقول بأه الشعر الطبيعي ليا في اي بوست بس قبل مااقوله احب اقول اني للأسف هتغيب لفترة لإني داخل على امتحانات وادعولي





أجيبيني حبيبتي


حبيبتي عندما احسست بطيفك ... تحرك القلب يسابق خُطاكِ


كنت اسمع صمتك وهمسك ... أهتف حبيبتي أعشق سناكِ


وكنت أقاتل لأكسب وِدُكِ ... وكأن همومي أمست رضاكِ


صرخت وتَغَنّيت بقولي أحبك ... وليت صراخي تسمعه سماكِ


أرسلت مراسيلي تناشد قلبك ... أغازل الحور في عيناكِ


وأجبت بغموض هوه صمتكِ ... أأعلم اني سلبت هواكِ


أم اكتب النهاية بقلمك ... ويكون موت قلبي فداكِ


دنياي عذاب في بعدكِ ... وأتمنى الهلاك بين يداكِ


فأتسحريني بُحُبكِ كعادة كرمكِ ... أم ينهار حبي دون لقاكِ


حتة مقابله








ساعات الانسان يحب انسانه قوي



ويتهيألي ان لو هيه بادلته حبه هوه ده اقصى امله ومناه في الدنيا دي



وساعتها هوه هيعيش الدور ويجري هنا وهناك فرحان قوي وطبعا يروح يشتري شرايط عند الحليم من أول بهواك لحد قارئة الفنجان ويقعد يسمعها ليل نهار وياسلام وكإنه اخترع اختراع وخلاص خد براءة اختراع

وللأسف دايما الانسان مش بيبص للي بعد الحب

هيروح لأبوها ازاي وهوه اساسا حيلته ايه وله شهادته ايه علشان على الاقل يخطبها

وهوه طبعا ناسي كل الكلام ده وطاير من الفرحه لحد ماتيجي حبيبته بعد ماطبعا وداها حدايق مصر كلها

وراحو جنينة الاسماك وعاشو الدور مع عبد الحليم برضو



تيجي تقول له حبيبي مش ناوي بأه تكلم بابا ؟؟؟



اوبسسسسسسسسسس



هوه عمره مافكر في الموضوع ده ولا عمره فكر هوه معاه ايه ولا بيملك ايه اساسا ده حياله بياخد مصروفه من ابوه



يبدأ بأه القلق يطنطط على وشه



ويقول لها طيب اديني فرصة اكون نفسي (كالعاده كلمت المصريين كإنه انسان مش متكون ورايح يعمل عملية ويكون نفسه) 4 سنين وله 5 خمسه كده اكون ظبطت المواضيع



حبيبته :: يانهار كله ألوان ده انا امبارح صاحبة ماما كلمتها على واحد عاوز يتقدم لي



الواد الحبيب :: مين ده قوليلي بس عليه ( كإنه هيروح يقتله ) ؟؟



حبيبته :: مش مشكلة مين... المشكلة هقول ايه ؟؟



الواد :: قوليلهم انك مش بتفكري في الارتباط دلوقتي



حبيبته :: ببساطه كده لا طبعا انا مش موافقه انا عاوزاك تيجي تكلم بابا النهارده او بكره وتحجزني (( كإنها عشرة كيلو سمك )) من اي حد عاوز يخطبني ؟؟



الواد:: ياحبيبتي بس اكيد ابوكي مش هيوافق ومش هيرضى يقابلني

حبيبته :: لازم تيجي



الواد :: *تصعب عليه حبيبته هتضيع من ايده لازم يعمل حاجة * طيب ياحياتي انا هجيلكم بكرة



حبيبتك :: طيب ياحياتي



ويكملو مشوارهم في الجنينه





========== وبعد يومين ================================



راح فعلا زي ماوعد حبيبته لأبوها وللأسف مكنش سأل عن ابوها قبل مايروح

معرفش انه راجل جد وميحبش الحال المايل

المهم



دخل طبعا في الصالون عشرة متر * عشرة متر(كان ممكن نقول 100 مترتربيع وخلاث بس اللي يفهمنا بأه من الدكاترة اللي بيقروا البوست) في أرقى أحياء المعمورة



الواد دخل * اش اش ايه ده اللي انا دخلت فيه ده ده انا عايش مع عيلتي في اوضتين وصاله ومفيش اي مشاكل بالنسبالي ** المهم جه ابوها وباين على مظهره هيبه من بعيد كرفته وبدله من فرنسا

وهوه ياعيني لابس الحته اللي على الحبل ونزل اشترى جاتوه من لابوار ال يعني اشترى الدنيا كلها وجه



طبعا الواد حس انه اتورط

المهم الاب دخل قعد وكان باين عليه بشوش ومفيش مشاكل بيحاول يهدي اعصاب الولد



طبعا الاب ساكت (الطبيعي ان الاب هوه اللي هيتكلم بس لإن هندسي علمتني افترض الافتراضات الغير طبيعيه فهنعتبره ساكت ) والواد مستني الاب والاب مستني الواد



لحد ما الواد اتنحنح عاوز يخلي الاب يتكلم فالاب قال له منور ياابني



وبعدين طبعا بعد المقدمة الطويله بوجودك ياعمي وعامل ايه وازيك ومش عارف ايه والكلام الفاضي بتاع المصريين ده



الاب :: نتكلم بأه في الموضوع ياابني

الواد :: اتفضل حضرتك ياعمي

الاب :: الاسئلة الطبيعيه متخرج من ايه وناوي على ايه والحاجات دي

الابن :: (لو عاوزين نزود الطين بله نقول ان الواد في تجارةبس خلينا نفترض ان هوه في طب)انا متخرج من طب ياعمي بتقدير كويس وناوي اشتغل

الاب:: طيب ياابني بس لازم تكون بتشتغل علشان تفتح بيت

الابن :: ان شاء الله ياعمي

الاب :: طيب ياابني انته جبت شقه وله ابوك هيساعدك وله ايه الوضع

الابن:: لا والله ياعمي مفيش حاجة من اللي حضرتك بتقول عليها دي

(الواد لاحظ ان الاب بدأ يكشر)

الاب :: طيب عندك عربية ياابني وله هتخلي بنتي تركب مواصلات كمان

الابن :: لا مواصلات طبعا ياعمي ( وفخور قوي وهوه بيقولها ) بس لو اتحسنت الحال بعد الجيش طبعا هشتري عربية

الاب :: يعني لسه حضرتك عندك جيش

الابن :: طبعا ده واجب وطني ياعمي

الاب :: طيب ياابني انته جاي ليه

الابن :: علشان بحب بنت حضرتك



الاب طبعا رفض الجوازه دي وادى الواد درس مش هينساه طول عمره ( وبصراحه عنده حق ) والواد قام وقف وراح خد علبة الجاتوه اللي جابها معاه وهوه خارج يأكل منها ابوه وامه ومشي



طبعا القصص دي حقيقيه وبتحصل والله ياجماعه وفي الغالب الواحد مبيبقاش حاطت المواضيع دي في دماغه

وده طبعا غلط



المهم طبعا نقدر نقول كلام نوصف بيه الموضوع ده





حبيبتي



ناديتك يوما كنت وحيد ** وحبي لك بحر مديد ** وفي عينيك أُصبح شريد


أجابني اباك بفقري الشديد ** وعلمت يومها بأني مريض ** وأن دائي فقري العنيد


أكان يجب أن أولد طريد ** وفي الاحزان أحيى خليد ** وتبقين حبيبتي أمل بعيد


حبيبتي لن أحيى رقيد ** وسأحارب لأجلك كفارس صنديد


فهمس عينيك سحر فريد ** ولسحر ابتسامتك يسمو الحضيض ** ورقتك مع الايام تنمو وتزيد


شكرا للي وصل للنفطه دي لإن انا بصراحه تعبت ومش ناوي اقرى البوست واللي يشوف فيه اخطاء يقول منه لله الكيبورد مش منه لله انا لإني مش هراجع عليه


ياجماعه اللي يعرف عنوان للشعر اللي فوق او الخاطرة اللي فوق يقول لي في الكومنت بتاعه

أغرب لقاء




قصعدت بالليل ماسك السماعه كالعاده بكلم مين؟؟


اكيد مش بنت طبعا مش اخلاقي
بكلم شريف ( اعز صاحب ليا طبعاً )


وفجأه شريف يقول لي انا حاسس بألم في قلبي غريب


اقول له طيب ياابني اتنفس بالراحه مهو انا مش عارف اقول له ايه مجربتش ابقى دكتور وبعدين هوه اللي في طب مش انا


وفجأه اسمع من النااحيه التانية صوت تكه وبعدين محدش بيرد


طبعا انا ناديت عليه ياشريف ياشريف ياشريف


مفيش فايده محدش بيرد


قلقت طبعا وفي عز الشتاء سبحت في بحر عرق


مسكت موبايلي بااتصل بيه


اسمع صوت موبايله الناحيه التانية والاخر ولا هنا


قعدت ربع ساعه ساكت مكتوم من الخضه مبعملش حاجة غير ان الاخ شوشو الشيطان مش شريف طبعا عمال يلعب في دماغي


وبعد ربع ساعه استقر رأيي على ان الواد اتكل


قمت وقفت ومعرفش ازاي رجليا ساعدتني اقف


قلت انا هلبس وهصحي الحج الوالد ونروحله


ولما قمت عمال بنادي ياعم انته


ياشريف لو بتهزر الموضوع هيقلب بجد


مفيش فايده


ياشريف هصحي عيلتي واقعد ألطم زي الولايا


مفيش اي ريسبوندنج عند شريف ولا حتى صوت نفس


المهم قمت فعلا ورايح افتح باب اوضتي


لقيت شريف جاي على التليفون


طبعا متوقعين مني ايه (( سلسله طويله من الكلام اللي لو كان حاجة غير شتايم كنت قلتها ))


وبعدين


:: انته فين ياوغد ؟؟


ش: معلش اصل واحد تحت هنا انصرب بالعربيا وراجل كبير وكان ماسك مقشه في ايده بيسند عليها ونزلت اساعدهم


:: طبعا هديت نفسي وقلت الواد بيعمل عمل خير




تاني يوم


ش: محمد انا عاوز اقول لك ان انا اشتغلتك امبارح


ومكنش في عربية ولا واحد انضرب ولا اي حاجة مجرد اني رحت اتمشى باين في الشقة وحبيت اعملها فيك مقلب


:: ( سلسله طويله من الكلام اللي لو كان حاجة غير شتايم كنت قلتها))


::ماشي ياشريف شكرا


ش: ياعم متزعلش ومش عارف ايه وايه و ..............


:: ماشي ياعم




قفلت وانا الفولت بتاعي اكبر من الفولت اللي بيأين الهوا




لازم اشفي غليله منه


ملقتش طبعا غير اني اكتب فيه شعر ويكون هوا البطل




قلتله


أحببت قلبا يحب العناء ** أحببت قلباً يريد الشقاء



قلباً يفهم حديث الطيور ** قلبا حقاً حُبُهُ عناء



حاولت ابتكار حقاً دواء ** ولكن رحلت محاولتي هباء



ترجلت ألوم زمناً عنيد ** حقاً انني اريد البكاء



ذهبت حيثما يبكي السحاب ** لم أدري انه أغرب لقاء



فإذا بها تصرخ في انهيار ** ثم تسقط قتبرق لها السماء



ورحلت حبيبتي دون وداع ** رحلت دون وعداً بلقاء



رحلت وليتني لم ارى الحياة ** ليتني حتى لم انفس الهواء



انا الذي اعالج الغرباء ** لم أستطع ابقاءك في شفاء



لا أستحق ان ألقب بالطبيب ** يجب أن يُقال أغبى الاغبياء




اي حد ممكن يقول ان ده مش شعر ولايقرب له ومش هقول له حاجة بس الحاجة اللي فارحاني اني


هديت اعصابي من د.شريف


وعلى فكره ياشريف انته البطل يعني انته اللي بتحكي




واسف على اني طولت عليكم


ومش اسف على اني طولت عليك ياشريف