أعظم أمانة



وحشاني يامصر جدا رغم اني مشفتكيش ...
عارف تفاصيل شوارعك رغم اني معرفتكيش ....
بلد غريبة ..
عجيبة ..
حكاية حلوة متتحكيش ...

قالولي حزينة
مكسورة العزيمة
ضعيفه... مستكينة
ورغم اللي فيها
هتفضل ياولدي عظيمة
وأمينة

أمينه عليك وأمينة عليهم
هتحافظ عليك
وعلى اللي محافظتش
عليها ايديهم

......................

اسف يابلد  ... مش هصبر عليكي
ومش هسمع كلام
قالهولي فيكي
انا الولد
انا الكبَد
انا اللي مش هتسنى فرحك
طول الأمد


اسف لإني
لسه بحبك
اسف لإني
مش هسيبك تأني
اسف لإني
روحي دي منك
واسمك ده مني

ياأرض الكنانة
ياأعظم أمانة
الصبر عليكي اصبح خيانة
وانا اتعلمت فيكي
اصون العشرة
وأأدي الأمانة