مش قادر اكتب




والله انا لسه مخلصتش امتحانات بس صعب عليا ان ناس تدخل عندي وميلاقوش حاجة جديده وبجد وحشتوني جدااا وبعتذر للناس اللي مردتش عليهم وهرد قريب ان شاء الله وبشكر قوي الناس اللي سألت عليا وبجد والله حاسس انكم حاجة كبيره اوي في حياتي

طبعا دي لما مسكت القلم ومعرفتش اكتب اي حاجة فكتبت الشعر ده وده كان شيء طبيعي اني معرفش اكتب وانا مضغوط في الامتحانات


-----------------------------------------



مستحيل اني اقدر اكتب
شعري انا ليكي
بيهرب فكري
لصفو عنيكي
بيتخلى عني
ويسرح فيكي




وافضل تايه مش قادر اكتب
وتعيشي حياتك وانا متعذب
ومتقوليش اننا بتهرب
دايب فيكي....ومش قادر اكتب




هاكتب ف ايه وله ف ايه
مش قادر اكتب وهقول لك ليه




اخاف اكتب مقدرش اوصف
وله احوّر فيكي واحرّف
ومش قادر حتى اني اتصرف
اسف ملاكي...والله مااعرف




هاكتب ف ايه وله ف ايه
مش قادر اكتب وهقول لك ليه


خايف اكتب كلامي يتكتف
بوزن وقافيه وكلام متزيف
وله يكون كلام متستف
لا متهندم ولا متأيف



هاكتب ف ايه وله ف ايه
مش قادر اكتب وهقول لك ليه




جايز اما اجي اوصفلك حاجة
اوصفها كده بكل سذاجه
وانسى انها جمله محتاجه
مطفيه كده ومش وهّاجه




هاكتب ف ايه وله ف ايه
مش قادر اكتب وهقول لك ليه



ازاي هترجم سحرك
جوه حروف؟؟
وازاي هلون طيفك
بكلام مصفوف؟؟
وازاي هقدر اكتبلك
وانا ملهوف ؟؟



هاكتب ف ايه وله ف ايه
مش قادر اكتب وقلتلك ليه

------------------------------------------

الموضوع اللي جاي اقدر استنبيء اسمه انه

مازلت ابحث

تدوينة للمدونة اميرة الاحزان

موجود عندي درافت ويارتني كنت اقدر انزله بدل التهييس اللي فوق ده

بس مش مشكلة هيه تبأه تنزله بنفسها

متنسوش انا لسه اجازة

15 Responses
  1. ربنا معاك و التوفيق فى الامتحانات و الله
    وانا كمان مش عارفه ؟أكتب ايه ولا غيه
    كل الكلام ياعينى عليه


  2. Abo 7anf Says:

    السلام عليكم
    فينك يمان
    المهم تطمنا عليك
    و ربنا يوفقك
    اه صحيح
    الموضوع جامد


  3. اكيد مش قادر تكتب عشان القلم كان فاضى وبيشحط صح ؟


  4. اكيد مش قادر تكتب عشان القلم كان فاضى وبيشحط صح ؟


  5. appy Says:

    طيب يلا امشى من هنا هرش عليك ميه مش قاعد تذاكر ليه هااااا متخافش انا بخلى بالى من المدونه امشى يالا ربنا معاك


  6. الامتحانات مااقبحها

    انا خلصت عقبالك

    ومنتظرك في المدونة في شكلها الجديد


  7. ربنا يوفقك فةى الامتحانات
    وربنا يهديك وتكتب بس الكلام الجميل دة ومش عارف تكتب ؟؟؟؟؟؟؟؟؟؟؟؟؟؟
    تحياتى لك


  8. ان شاء الله تخلص امتحانات على خير يا معلم
    و الشعر رائع كالعاده
    يلا شد حيلك يا بطل


  9. Desert cat Says:

    ربنا معاك ويوفقك
    لما الكلام ده ومش عارف تكتب ايه
    امال لما تعرف هتعمل فينا ايه


  10. Tamer Nabil Says:

    كلمات جميلة

    واحساس رائع

    ربنا يوفقك فى الامتحانات ياصاحبى

    بالتوفيق

    تحياتى


  11. Anonymous Says:

    صديقي العزيز

    ربنا يوفقك و ترجعلنا بسلامه و بشهاده النجاح انشاء الله
    بحييك علي الكلمات الرقيقه اللي كتبتها و كم المشاعر الرائعه التي تحتويها

    ركز في الامتحانات و انشاء الله ناجح

    تحياتي و دعواتي ليك بالتوفيق انشاء الله


  12. واو واو واو
    ايه يا عم كل ده
    هى البلد كلها بقت حبيبه ولا ايه يا جدعان
    يا عم ركز ف الامتحانات احنا هنروح فين يعنى
    بالتوفيق ان شاء الله


  13. ههههههههههههههه

    ضحكنى تعليق بنت مصرية

    خليك فى مذاكرتك ياواد

    المهم بس تطمنا عليك

    ويارب بتنجح بقى عايز اشرب الساقع

    داخل على طمع زى مانت شايف


  14. اولا ربنا يوفقك فى الامتحانات الكلام بجد حلو اوى فية حيرة العاشق ولوعة الحب تسلم ايدك بجد


  15. الدعوة لحظر الحزب الوطنى

    لماذا لا نقوم بعمل حملة قومية من أجل حظر وحل ما يسمى بالحزب الوطنى
    ولماذا لا نقوم برفع دعوى قضائية امام المحاكم المختصة
    نتهم فيها الحزب الوطنى بأنه حزب يهدد الدستور ويعطل الدستور
    وبأنه حزب يزور ارادة الشعب ويستغل ما لديه من سلطات ونفوذ من أجل البقاء فى الحكم لأجل غير مسمى


    قد يقول قائل من الصعب أو من المستحيل أن يحدث هذا الأمر ومن المستحيل أن ننجح فى حظر الحزب الوطنى
    وانا غرضى ليس حظر الحزب كأجراء قانونى .. وإن كان هذا ممكن .. ولكن غرضى هو مهاجمة هذا الحزب الفاسد الفاشى الفاشل المزور
    مهاجمته قضائياً وشعبياً وإعلامياً
    فلنتخيل سوياً هذا الخبر على صدر صفحات الجرائد وفى مقدمة النشرات الأخبارية
    قوى حزبية وشعبية واعضاء معارضين بمجلس الشعب المصرى
    يطالبون بحظر الحزب الوطنى الحاكم ومحاكمة اعضائه