حبة صبر في آخر الكاس





حبة صبر في اخر الكاس 

وبراهن بيهم بين الناس

يمكن انسى جراحي في امسي

ويمكن اكسب بيهم نفسي

يمكن اجازف واعشق تاني

واعزف ألحاني انا من تاني

بس الخوف

اني اطوف

جوه خيالي

وكل الخوف

اني انا اكسب 

ويكون المكسب

حبة عتمة في ضل النور

شوية حب فوق السور 



طبعا غيابي كان غير مبرر اطلاقا بس جايز يكون خيالي اتحجم ومبقتش قادر اكتب وجايز اكون غير مهيأ حاليا لكتابة اي حاجة


انا بعتذر ليكم ولنفسي

وكل سنة وانتم طيبين وعيد سعيييد ان شاء الله


ألف مليووون مبروك




النهارده ياجماعه ده عيد خااص وخاااااااااااص جدا بالنسبة ليا وللمدونة كلهااا






لإن اختي وصاحبة المدونة أمير الاحزان النهارده اللي كان يشوفها كان ينسى الاحزان كلها " ال اميرة الاحزان ال" النهارده بيتهيألي انها اتولدت في الحياة دي من جديد علشان تملاها باشراقة وابتسامة وسعادة



فبجد احب اقول لها الف الف الف مبروووووووك




هبدأ كلامي انا بالتنهيدة

اللي هقوله مش حاجة جديده

اللي هقوله ده بس هدية

هدية مني لأحلى هدية

من سبحانه دي متنقية


عارف ان النهارده ده عيدك


واسمحيلي اشاركك عيدك

============



فاكرة انا اول يوم كلمتك

فاكرة يوميها لما سألتك

اسمك ايه؟

فاكره يوميها ايه كان ردك

اسمي ده كتير ومش بالساهل

وانا متعودتش اني اتساهل

كنتي طفله جواها اميرة

عمرها ماعرفت التكشيرة

وعرفتك لسنين وسنين

شفت الصبر والحنية

شفت الضحكة المنسية

شفت حورية انا عالأرض

كل جحيم اهل الأرض

جواها هي اتولد الضد

اتولد الحب والكره اتصد

اتولد الخير والشر اتهد

عرفت معاكي ازاي الوفى

ازاي بكلمة يتولد الدفى

عرفت فيكي معاني كتير

ازاي ارفرف زي الطير

اتعلمت اني اكون انسان

يعيش حياته بالألوان

اتعلمت كتير من سحرك

اتعلمت ....اتعلم منك


ألف ملييوووووووووون مبروووووك



حاجة اخيره




افتكرتك في نفس المكان

اللي جمعنا زمان

نفس الامان

نفس الشعور

نفس العطور

بس ضاع منه الحنان


انا مش قادر مشفكيش

اتنفسك ومحسكيش

الاقي صورة

وملقكيش


جايز

الحزن بان في العين

بس انا جوايا انين

انين قلب حبك اوي

خاف تضيعي منه اوي


جوايا صرخه صنعها الكبت

صرخه شقت بحور الصمت


صرخه قلب مجروح اوي


ايوة

انا شايفك جوه الصورة

وفاكر كلامك وقت الصورة

"

انا علطول هفضل فاكراك

بحبك قوي ....ومش هنساك

"

ايوة انا فاكر كل كلامك

حفرته في قلبي مهوّ مكانك


بحبك

بحبك يااغلى ماعندي

قصدي اللي كان عندي


كنت معاكي مالك الدنيا

بس رحتي ياروحي فثانية


مش هنساكي ولايوم اقدر

ده اللي مابيننا ماهيتقدر

ايوة انا راضي اني اتكدر

ولاهتضايق ولاهتصدر


بس اقول لك حاجة اخيرة

حاجة عليا حقيقي مريرة

حتى ان دمع قلبي كتير

هيفضل قلبي

شايل حبك

حافظ رسمك

سامع همسك


"رحمة الله عليها"



عارف ان الكلام ملخبط وغريب بس بجد من كتر ماكنت متأثر وانا بكتبه فمش عارف كتبت ايه ولا عارف ظبطته وله لا بس هو كده وخلاص فمعلش خلوها عليا المرة دي

نويت




نويت خلاص.. اعيش الحقيقة

نظرة بتكدب.. سميتها جريئة

وضحكة بتقتل.. سميتها بريئة





كنت فين ياعقلي لما قلبي تاه

وازاي اقول لروحي حالاً تنساه


وبتقنعني طريقنا وصل لمنتهاه


وناويت تجرح فقلبي وماصدقت الحياة





صدقت ياقلبي الفرحة

في عيون بتخدع



ونسيت ان الغلطه

في زماننا بتوجع



وان طيبتها كدبه

ولشرورها بتطبع




نويت اغير فيا كتير


اولها اني مكنش اسير


اكسر قلوب ومكنش كسير


ابكي عيون


ولا اكنش حنون


وله ده يبقى عليا كتير ؟؟






الحاسة السادسة

السلام عليكم ورحمة الله وبركاته
بما اني مش لاقي حاجة اكتبها
اللينك ده بيتكلم عن حاجة اسمها الحاسة السادسة هو لينك فيديو
بس انا حبيت اقول ان فعلا الستحيل لا شيء زي ااعلانات اديداس بالظبط
Impossible is nothin
ياريت تتفرجوا وتدوني رأيكم
اللي شايف ان الجهاز ده مستحيل يقول
واللي عايز يفهم حاجة معينة انا مش فاهم اي حاجة
thnx

من انا




لطالما كان الزمن يرهقني كثيرا

يبدد طاقاتي ويهلك قواي

ورغم ذلك كنت احب ذلك الصراع

وكأن هزيمتي دائما هي تلك الطاقة

التي تدفعني الي ارهاقني اكثر

كان صراعا بائسا لا امل منه

ولكنه امتعني كثيرا

مثلي مثل الطفل

الذي يحب اللعب مع الكبار

رغم خسارته الدائمة الا انه

مستمتع بها



الا ان دوام الحال من المحال

ويبدو ان طاقتي قد فنيت تماما

ولم يعد بمقدوري مقاومة الزمن

لا استطيع غوض المعارك الفاشلة

اصبحت مستسلما من البداية

اتذكر ذلك اليوم جيدا الذي حولني

من نشاط وطاقة الى خمول وارهاق

فقد كان ذلك اليوم هو اخر شيء اتذكره

واصبح النسيان هو اكبر همومي

كيف سيمكنني الصمود امام زماني هذه المرة

كيف ستكون العودة

حتى تلك التدوينة الشاعرية التي طالما احببتها

اصبحت لا اطيق حتى التفكير في امرها

غريق انا ام تائه ام مازلت مصدوم

انا ذاك الشاب المبتسم ام الشاب اليائس البائس

الذي لا يدري من هو؟


نعم استطيع الآن الصرااخ

من انا؟؟؟

في هذا العالم المجنون



لا أفتح بابي للغرباء

لا أعرف أحدا

فالباب الصامت نقطة ضوء في عيني

أو ظلمة ليل أو سجان

فالدنيا حولي أبواب

لكن السجن بلا قضبان

والخوف الحائر في العينين

يثور ويقتحم الجدران

والحلم مليك مطرود

لا جاه لديه ولا سلطان

سجنوه زماناً في قفص

سرقوا الأوسمة مع التيجان

وانتشروا مثل الفئران

أكلوا شطآن النهر

وغاصوا في دم الأغصان

صلبوا أجنحة الطير

وباعوا الموتى والأكفان

قطعوا أوردة العدل

ونصبوا ( سيركاً ) للطغيان

في هذا الزمن المجنون

إما أن تغدوا دجالاً

أوتصبح بئراً من أحزان

لا تفتح بابك للفئران

كي يبقى فيك الإنسان


============

احدى قصائد المبدع فاروق جويدة
ايه رأيكم في جمله
الباب الصامت نقطة ضوء في عيني

============

فضفضة-استحملوني



يبدو ان الحزن قد توغل كثيرا داخل ذلك القلب المسكين

كيف امكنه الصمود تلك اللحظات وكيف امكنه الحياة بعدها

وكأن شيئا لم يكن

لم يتغير شيء حتى ذلك الكوب الفارغ مازال هنالك في مكانه صامدا وكأنه لا يعنيه من الامر شيئا

استغل الحزن ضعف قلبي وسيطر على كياني

اصبح جزءا لا يتجزأ من حياتي

حتى ابتسامتي لم تعد هي تلك اللي عهدها البعض

الجميع اصبحوا ينفرون مني كما لم يكونو سابقاً

وكأن الرابط بيني وبينهم هي تلك الابتسامات اللتي اهدرها الزمان

ضاع حبي للحياة وللبشر ايضا

كنت اتمنى الا يحدث هذا ابدا

ولكن ليس كل مايتمناه المرء يدركه


============================

بجد مش قادر اركز في اي حاجة فكل مابدخل عند حد منكم مش قادر افهم هو عايز يقول ايه فسامحوني لغيابي عنكم **بعتذر** ليكم

============================

بسم الله

بسم الله ان شاء الله هرجع اكتب تاني
وربنا يخليكوا ليا بجد وبخص اختي العزيزة منى بجد بشكرك جدا
وتحياتي

سبحان من رتب هذا القدر

محمد بيقدم على عملية من 4 سنين
وبعد ماعدوا الاربع سنين حددوا معاد العملية
محمد: انا مسافر بعد بكره
هي: ليه هتسيبني تعبانه كده؟
محمد:متقوليش على نفسك كده انتي زي الفل اهو
هي: هتسافر ليه؟
محمد:هعمل عملية بسيطة كده وراجع
هي:ترجع بالسلامة ان شاء الله
قبل السفر ب 10 ساعات
هي تعبت قوي
محمد:يله ياجماعه هنروح المستشفى
في الطريق
هي :انا هموت يامحمد وانته مش موجود جنبي
محمد: متقوليش على نفسك كده ومتزعلينيش
هي: طيب خلي بالك من نفسك
في المستشفى
الدكتور:انصح بانها تتحجز فترة
محمد محتار وزعلان وهي موافقه
محمد:خلاص اوك
هي وفي عنيها دموع:لو جرالي حاجة متزعلش يامحمد
محمد"وهو منهار":متخافيش وان شاء الله خير
محمد محتار يسافر وله يلغي السفر وفي باله كل العملية شوية برد وهيعدوا بس قال خلاص بكره هتصل بيها قبل مااروح المطار لو لقاها بخير هيسافر لو تعبانه مش هيسافر
محمد:ازيك دلوقتي عامله ايه؟
هي:الحمد لله زي الفل
محمد في عقل باله:والله صوتها كويس
محمد:يعني مفيش اي مشاكل واحسن دلوقتي
هي:اه خلي بالك من نفسك
محمد:مع السلامه
وسافر محمد يوم الجمعه والعملية الحد
محمد يوم السبت:ازيك عامله ايه؟
هي"وهي في العناية المركزة": الحمد لله خلي بالك من نفسك
محمد:استنيني انا هعمل العملية وهجيلك على طول
هي"وصوتها مخنوق":حاضر
وهي بتسأل الناس:محمد هيعمل العملية امتى؟
لحد ماقالولها محمد عمل العملية
هي: الحمد لله
من هناك
محمد فاق يوم الاتنين و بيكلم والده في مصر بيقول له هي بخير قاله اه بس مانعين الزيارة ومبتكلمش حد لإنها في العناية المركزة
محمد:طيب ماشي وقعد اسبوع مش قادر يتحرك
ووصل مصر يوم الجمعه
في المطاربيكلم نفسه:لازم اول مااوصل اروح لها على طول
وصل محمد وعرف انها انتقلت الى رحمة الله بعد ماعرفت بنجاح عمليته من زمان
ياااااااه على ده حب ويااااه على ده تقصير في حق من احبني ويااااااه لترتيبات القدر
إنا لله وإنا اليه راجعون
اللهم اجرني في مصيبتي واخلف لي خير منها

الواقع ام التقليدي



==================================================================
بتأسف بجد عن الغيبة الطويلة دي بس بجد ظروف صحية اقوى مني اول مرة اجرب معنى كلمة طريح الفراش حاجة صعبة اوي ربنا يبعدكم عنها يارب
دعواتكم
==================================================================
عندما يهرب عقلك من الواقع الى ماهو تقليدي وطبيعي بالنسبة اليه كما تعود دائما




تجد عقلك حائرا بين نارين كلاهما يكرهه ويبغضه الى ابعد الحدود




فماذا ستختار انت او بمنطوق اخر ماذا سيختار عقلك؟؟؟




الواقع ام التقليدي؟؟




فقد اختار عقلي الواقع وبرهن بجملة الواقع لا يتغير مطلقاً




فهل نستطيع تغيير الواقع؟؟

تااااااااج


تاج اهدتهولي المدونة هاجر " مشاعر صنعت كلمات " وبجد بشكرها اوي وهجاوبة اهو قبل ماانسى زي ماعملت كتير قبل كده




1- كان ينفع تختار عصر تعيش فيه هيبقي انهي؟ ومين الحاكم؟


في نفس عصرنا ده والحاكم يكون سيدنا محمد صلى الله عليه وسلم


2- أول أولويه في حياتك؟


عيلتي


3- أكتر حاجه بتحبها في رمضان؟


كل حاجة
الواحد بيحس ان كل حاجة مختلفه وبعدين اللمة بتزيد اوي في رمضان وانا بحب اللمة بصراحه


4- أوصف أجمل فطار ممكن تفطره؟


لما اكون عامل فيه حاجة بإيدي مع اني مبعرفش اعمل حاجة فبتخرج ابداعات


5- لو انت حاكم هتكون عادل؟ وهتعرف ازاي؟


ههههههههههه انتم كده دخلتم ارضي ياجماعه
انتم بتتكلمو في ايه
ده انا هكون انسان مفتري
لا بأمانه انا مقدرش اكون حاكم لإنه فعلا حمل رهيب واخاف منه
مش ظلم بقصد لكن ظلم من غير قصد


6- مين أكتر اعلامي بتحبه؟


الاستاذ وائل الابراشي


7- لو ممكن شغلانه تانيه تختار ايه؟


هو انا لسه مشتغلتش
بس زي ماقلت مشروع مهندس
ولو هختار شغلانة تانية فياريت لو طيار



8- تاني بلد تحب تعيش فيه بعد مصر؟


انا بعشق تراب مصر بس مش قادر استحلم اعيش فيها ونفسي اخلص دراستي واسافر في اي بلد تانية وغالبا هتكون كندا مش حبا في كندا لكن هي المتاحه

9- اوصف ترتيبات أجمل فرح ممكن تحضره؟

فرحي ان شاء الله وطبعا كلكم معزومين من دلوقتي


10- بتراعي كلام الناس والقيل والقال؟ وليه؟

كلام الناس لو فعلا حسيت اني صح بحاول اغير من نفسي
لكن معملش الحاجة الفلانية علشان مين هيتكلم ومين هيقول لا مبهتمش
وبأمانه لو بلغني ان حد اتكلم على حاجة انا عملتها من ورايا بيصغر في عنيا اوي
لكن برضه تقدروا تقولوا كل ظرف وليه اسبابه ممكن يكون مش عايز يضايقني
وانا دايما بختلق الاعذار للناس اللي بحبهم


11- صحيت من النوم لا موبايل ولا كمبيوتر ولا كاميرا ديجيتال ورجعنا لعصر الاحصنه والحمام الزاجل؟

ممكن اكتئب بأمانه


12- السعاده هي ... ؟

رضا الله واننا منخافش من بكره والنجاح كمان


13- عندك أمل؟ وأسبابك؟

اه انا عندي امل كبير

علشان انا مسلم وعارف ان الله قادر على كل شيء


14- لما تحب تهرب من كل حاجه بتروح فين؟


بأمانه متعودتش اهرب من اي حاجة ماعدا الحزن
انا جبان جدا قدام الحزن
ولما بييجي بتكفيني كلمة حلوة او حتى اني اتمشى في الشارع



15- امتي أخر مره أخدت فيها نفس وقلت ياااااه أنا كبرت؟


لما قريت السؤال بجد


16- بتشرب سجاير ولا لا؟ وايه رأيك في الستات والرجاله اللي بيشربوا؟

مبشربش


لكن بقول عنهم انهم مساكين وقعوا في الخدعه يعني جربوها مرة علشان يعرفوا الناس بتشربها ليها كسؤال محيرهم

والمادة الادمانية اللي جواها سيطرت عليهم بعد كده


بأمانه حصلي موقف اني غلطت برضه وقلت اجرب وطبعا بتكون بمساعدة صديق سوء وجربت وفعلا طعمها وحش جدا بل مقزز كمان لكن تاني يوم جالي احساس ان انا عايز اشرب معرفش ليه بس عرفت ان اكيد وراها ان


17- بتعرف ايدك الشمال ازاي؟


بعرف اليمين الاول اللي باكل بيها او بكتب بيها وعكسها تبأه الشمال

"ايه السؤال الغريب ده"


18- أكتر آله موسيقيه بتحبها؟

رغم اني مبعرفش اعزف على ولا اله موسيقيه لكن بحبهم كلهم جدا جدا كمان واكترهم البيانو والعود


19- ليه الزوق والنخوه اتعدموا؟


هما متعدموش بس هما قلو والسبب معروف قلة ايمان


20- ايه الحاجات اللي لو حصلت هتبقي سعيد؟


بأمانه اقرب من ربنا اكتر واحقق نجاحي في دراستي وفموهبتي وانزل زي ديوان صغير كده بس لسه الحلم ده قدامه كتيييير


21- تحب أرض زراعيه ولا اجنس عربيات ولا كام عماره ولا فلوس في البنك؟

بكرههم كلهم وبأمانه مبحبش الفلوس ولو معايا لازم اصرفهم لإني للأسف انسان مبذر جدا


22- تحب البحر ولا النيل؟

البحر وغالبا بيكون كل ممنوع مرغوب يعني انا مش كل يوم بشوف البحر لكن على الاقل كل شهر بعدي اتفرج على النيل


23- مركب ولا طياره؟

مركب لنفس السبب بتاع السؤال اللي قبله


24- شخص مجنون ولا عاقل؟

عاقل بس الناس ممكن تفكرني مجنون والاحلى في

الموضوع اني بسيبهم يفكرو وهنا يكمن الجنون


25- تقرا كتاب ولا تتفرج علي فيلم؟

لا اقرى كتاب وغالبا مبجبش كتب الا لو كنت واثق اني هحبه

وممكن اقعد 3 تيام معرفش انام علشان اخلص الكتاب



-- اهداء التاج --

بصو انا سبق واتهدالي التاج ده بس نسيت من مين وكمان جالي ييجي خمسه ونسيت هما ايه ولا مين اللي اهداهم وبجد موقفي محرج جدا لإني قبلتهم فانا قررت اني مش هدبس حد في الموضوع ده ماعدا زميلتي التدوينية الصامته اميرة الاحزان


هي اللي اختارت الاستايل بتاع المدونة متشكرين اوي لمجهوداتك الجبارة ياانسة بس اللي كنت مختاره كان احسن :)






تعالوا نفهم الحياة


سبحان الله



عشنا طول حياتنا بنحاول نفهم الحياة

بنحاول نعرف ازاي نلاقي الفرح وازاي نهرب من الألم اياً كان ايه الألم

عندنا خوف من بكره كنكره

وخوف من بكره كنتائج لأحداث النهارده

حاولنا كتير وحاول قبلنا ناس اكتر

ولحد دلوقتي في ناس كتير لسه عندهم لبس في الموضوع ده

الدنيا مسرح كبير وان كل الرجال والنساء ما هم إلا لاعبون على هذا المسرح




من اهم جمل شكسبير اللي اعتبرها العلماء تفسير لسير الحياة يعني اكيد يقصد مسرح وكل واحد هيقضي دوره "هدف معين يعني" نقدر نقول حاول يوصل بس تاه


اما بأه اينشتاين فقال


يبدأ الإنسان بالحياة، عندما يستطيع الحياة خارج نفسه

بدأت تفهم شوية يااينشتاين فصدك يعيش في ملكوت تاني مع كيان تاني هو حاول يوصل بس تاه برضه

وبعد كده جت ماري كوري




لا يوجد في العالم ما قد يخشى منه هناك فقط ما قد لا يفهم جيدا


عندها حق هي حاولت تقول يعني ان مادام احنا خايفين من الحياة يبقى مش فاهمينها صح اكيد ياماري انتي مش فاهماها صح

وطبعا احنا مش سهل نوصل لعبقرية اكسبير ولا لنسبية اينشتاين ودهائه ولا حتى هناخد مرتين جايزة نوبل زي الاخت ماري

لكن للأسف كلهم موصلوش للسر
السر الموجود في كتاب الله سبحانه وتعالى وسنة نبيه من زمان





بنخاف من بكره لإننا هجرنا كتاب الله سبحانه وتعالى وهجرنا سنة نبيه صلى الله عليه وسلم

"فذكر فإن الذكرى تنفع المؤمنين"

ياناس
"لا يغير الله مابقوم حتى يغيروا مابأنفسهم"



اللهم انت ربي لا اله الا انت خلقتني وانا عبدك وانا على عهدك ووعدك مااستطعت اعوذ بك من شر ماصنعت وابوء لك بنعمتك علي وابوء بذنبي فاغفره لي فانه لا يغفر الذنوب الا انت

============

كنت عايز اقول ان بأمانه فينا ناس كتير كويسة في عالم التدوين ناس بتحاول تصحح الامور وتدعوا للخير وناس بتعبر بمنتهى الصدق

بجد شيء اكتر من رائع
فهل هو زي مااتقالي اول مادخلت عالم التدوين انه عالم افتراضي ووهمي؟؟
==============