معلش يادكاترة سيبونا نتكلم عن القلب




سوري اني اتأخرت على البوست الجديد وسوري للي دخل وملقاش جديد بس فعلا كنت مشغول قوي


عموما ماعلينا المهم ان عندي كلام كتير وبوستات اكتر اقولها واحترت انزل ايه واخلي في جعبتي ايه عموما انا هقول اللي هقوله والامر لله وحده


اليومين دول مهتم بتفسير شوية ظواهر تفسيرات علمية وده يدل على مدى الفراغ اللي انا فيه وبتناقش انا وصاحبي وحبيبي الباشمهندس محمد حلمي في الموضوع ده


المهم اخر ماتوصلنا اليه في قضية الحب على انه وطبعا لأي دكتور هيدخل يقرأ ينسى انه دكتور ويفتكر انهم مش هيعرفوا يفسروا الحب زي مااحنا هنفسره


بداية احب اقول ان اي حاجة بتتحرك حركة منتظمه زي القلب اللي بيدق باانتظام بيبعت زي موجات كده وده اللي الافندية الدكاترة بيرصدوه وهما مش عارفين سببه اصلا


ماعلينا المهم الحب عباره عن ايه بأه


بصو ممكن تشوف اي واحد من مرة واحده قلبك يرتاحله والعكس مقبول برضه وده ليه بأه هوه ده اللي انا هقوله


قلنا مادام القلب بيبعت موجات اكيد هتتنتشر وتوصل لقلوب الناس التانية ده مؤكد

طيب مهو القلوب التانية كمان بتبعت موجات قلنا حلو هنا في 3 حالات


يااما موجات القلب دي هتبأه شبة الموجات الاولانيه "يارب حد يفهم" هنا هيحصل ان هما هيركبوا على بعض وهيعملو موجة اكبر هتأثر على الانسان بشكل معين وفي الحاله دي بتحس ان اللي قدامك قلبه زي قلبك او بمعنى اصح ترتاحله


او ان الموجات متبقاش شبه موجة قلبك خالص وفي الحالة دي هيدمروا بعض وفي الحاله دي تحس انك مش طايقه من اول نظرة والشعور هيكون متبادل عنده على فكره


اما لو كان قلبك بيبعت موجات فيها جزء متشابه معاه وجزء لأ ففي الحاله دي بتحس ان الموجات بتاعت قلبك طبيعيه جدا ومبتحسش بأي شعور وده الغالب عند الناس


مش سهل ابدا انك تلاقي موجة قلب حد زي موجة قلبك بالظبط علشان تحس بالحب الحقيقي ولما وصلنا للنقطة دي


قام محمد حلمي اتكيَف قوي وقال لي كده تمام انا بأه امشي في الشارع ادور على اللي نبضة قلبها شبه نبضة قلبي واكيد هلاقيها ان شاء الله


وطبعا انا بقول لك من هنا ان اكيد نبضه قلبك لسه منزلتش مصر لإن القلوب الصافيه مبقتش موجوده يامحمد وانته عارف الناس عاملين ازاي اهم حاجة بس ان احنا فسرنا للناس احنا بنحب ليه


وبكده يبأه مش عايز حد ييجي يقول لي معرفش بحب ليه اوك


وبرضه بالمعنى ده ان لو انته بتحب حب حقيقي يبأه اللي بتحبه بيحبك من غير ماتسأله




وإليكم الآتي




هنعيش العمر كام مرة


هيه مرة وياصابت يا خابت
هتلاقي روحك في لحظه نامت ياترا هتكون قبليها تابت وله هتكون خسرت و غابت


بلاش تحس انك خسران وبلاش تعيش عمرك ندمان عيش العمر والعب عالفوز وساعد الناس وبلاش تعوز
خليك دايما كده كسبان


اضحك اه.... ابكي ليه ؟؟؟ خايف على ايه وهتضحكي بيه نفسك في ايه ومتمسك بيه
ده كله هتسيبه في النهايه هتسيبه لما تخلص الروايه
خلي حياتك في ايدك تضيعها ليه


ابتسم ابتسامه لطيفه قول للناس كلمة ظريفه وخلي روحك دايماً خفيفه
ونافس علشان السعادة
بس متنساش
تكون المنافسة شريفه

خلونا نفكر بجد



حبيبتي أخشى ان تتلاقى عيوننا


فتهتز وتخفق وتضطرب معها قلوبنا


ويجبرنا الحب على اغلاق جفوننا


وينقطع صوت الحياة في صدورنا


ونتهامس كلمات الحب في احلامنا


ويخشى الشهيق من ايقاذنا


ويتبعه الزفير متمسكاً بحلمنا


فتعزف الدماء فوق شرايننا


موسيقى الحب اهداء الى قلوبنا


فتنفرج معها اساريرنا


ونهتف باسم الحب بأعلى اصواتنا


ثم تتنتهي معها لحظاتنا


ونحزن لأن الواقع هوه حياتنا


وحزنك هو مااخشاه حبيبتي



المهم سبكم من اللي فوق ده كلام بس افتتاحيه لكن الموضوع غير كده



الحمد لله لسه مقابلتش حد بيفكر بالاسلوب اللي انا عايزه واحتمال ملاقيش كمان انا شكلي بدور على حد مثالي قوي


في تفكيره وبرضه مش هلاقي المثاليه بحاول اطور في اقرب الشخصيات علشان فعلا نفسي ننجح ونوصل الى اننا نقلل نسبة الخطأ اللي كنت اتكلمت عنها زمان


حاولت اننا نبأه حاجة في الدنيا نبأه ناس متفهمة اكتر منبقاش سذّج في الدنيا دي العالم بيتقدم واحنا لسه بنتفرج على النمله اللي ماشيه تحت رجلينا وهنفضل طول عمرنا بنتفرج على النمله


كل واحد مفكر ان هوه احسن واحد ومش قابل كلمة من التاني وانا مش فاهم لييييه منفهم ونتفاهم ونتعامل مع بعض نفهم بعض ونحسّن من بعض ونتقدم خطوة على الاقل


فعلا ً زي مابيقولوا ربنا لما وزع الارزاق محدش عجبوا رزقوا لكن لما وزع العقول كل واحد اتكيّف من عقله وبأه طالع بيه السما


انا اللي عاوز اقوله ان في حاجات فيا كويسه وفي حاجات فيا وحشه والحاجات اللي كويسه فيا وحشه عند غيري والوحشه فيا كويسه عند غيري فلازم نفكر مع بعض ولازم نسمع لبعض


بصوا لازم الواحد يسمع للكل ويسكت

اللي دماغنا بتوافقنا عليه نعمله واللي مش بتوافقنا عليه منعملوش بسيطه مش كده

بس لازم الواحد يحكم دماغه مش يعمل اللي في دماغه وخلاص


لإن دي حياتنا واحنا اللي عايشينها وهنعيشها مرة واحد في الدنيا اللي من الدنوّ دي


بحب قوي الناس اللي بتحب حب مراهقه عارفين ليه لإنهم عارفين ان مش ده هوه الحب ومش دي احاسيسه وعارفين ان كل ده مجرد مشاعر مختلطه مش حب بس مش ده اللي بيعجبني فيهم اللي بيعجبني انهم مع انهم عارفين ده ورغم كل ده فهما بيعيشوا اللحظه وبيعيشوا الحب برضه وبيسهروا وبيتوهموا اوهام خياليه ومع انهم عارفين كل ده ومادام هما مبيعملوش حاجة ضد دينهم ولا ضد تقاليدهم " ولازم نكون فاهمين معنى كلمة الدين صح يعني مترحش تقابلها او تتقعد تتكامل معاها في شوية كلام فارغ وتقول انا لسه ملتزم بديني " فيعيشوا حياتهم ولو انا مكانهم والله لو مين جه قال لي كل ده لعب عيال وانا متأكد انه لعب عيال والله هكمله برضه لإني وزنته بعقلي ملقتش فيه مايضر سزى اني هفكر شوية وده ميضرش


اللي عاوز اقوله لازم نوزن كل حاجة بعقلنا وده اللي ضايع من حياتنا دي عقلنا ياعيني مختفي عن الواقع كل واحد مننا عايش في فيلم درامي اللي يقول انا اكتئبت واللي يقول انا زهقت وانا تعبت واللي يقول انا هسيب الدنيا دي واعيش في صحرا "كلمتي بصراحه " واللي يقف فوق البلكونه ويقول حد يوقعني من هنا وانا هسامحه يوم القيامه ويقوم ياعيني الهوا موقعه وتكون جت من عند ربنا وهكذااااا


النهارده وانا راجع من الكلية طبعا بعد يوم عصيب من 6 ونص ل 5 ونص مليان محاضرات ومعامل وطبعا طالع اشتري الورق المضروب اللي بيتباع بره دخلت عند المكتبه كالعاده بضحك للبياعه اللي عارفاني وبهزر دخل واحد صاحبي وقعدنا نتكلم في مادة معينة شوية لقينا واحد تانية واقفه بتبيع اول مرة اشوفها بتقولنا صوتكم لو سمحتم المهم انا قلتلها خلاص اوك مفيش مشكلة طيب شوفيلي حسابي فهيه بتعد فا انا عديت قبلها في دماغي وقلتلها 12 ونص فبصتلي وراحت رمت لي الورق وقالتلي خلاص طيب فا انا شكيت في نفسي لإني مكنتش مفكر انها هتعتمد على كلامي رحت عديت تاني طلعوا 13 فقلتلها لا دول 13 مش 12 ونص المهم زعقت واتضايقت "طبعا انا معرفش ليه " بس بصراحه جه في دماغي حلين الاول اني ارميلها الورق واسيبها وامشي واهو الورق المضروب مخلصش من السوق والحل التاني اني احسسها من جواها انها غبيه فقلتلها خلاص متزعليش وبهزر وبقول لصاحبي لا ياعم دول تعاملهم صعب قوي احنا بعد كده نجيب من مكتبه تانية وانا بضحك لقيتها قالتلي طيب روح هات من المكتبه التانية فقلتلها طيب انتي هدي اعصابك مش مشكلة انا بهزر هاتي الورق وخدت الورق ومشيت


من هنا بدؤوا اصحابي يعنفوني ويقولولي ليه انته مرمتش الورق في وشها قلتلهم اولا انا بحترم البنيئادمه اللي دايما بتبيعلنا واللي دايما بتعاملنا باحترام واللي جت في الاخر وقالت معلش واهلا بيكم تشتروا من عندنا وهكذا

وثانيا انا فكرت " ولأول مرة افكر وانا متنرفز بالشكل ده فعلا "ا وعرفت اني احسسها انها قليلة الذوق احسا مااطلع انا معنديش ذوق وفعلا حسيت اني عمري مافكرت قبل كده وعرفت اني لما بفكر بطلع القرار الصح اللي اكون راضي عنه قبل اي حد تاني


ياجماعه احنا كلنا بنفكر الحمد لله بس عمرنا مافكرنا صح خلونا نفكر صح ولو في مفاهيم غلط عندنا نصححها علشان نقضيها حياة كويسه بدل ما الحياة تتقلب كابوس على دماغنا


علاج الملل




اغمض حاجة لما الانسان يحس بالملل ومع الفترة بيقلب معاه بكئابه وشوية شوية بأحباط والموضوع في الاخر بيبأه زي الفل وبيشرف في الاخر في العباسية


بس الموضوع اسهل من كده بكتير الواحد بيحس بالملل وده من التعود وده كلنا عارفينه وحله كالعاده اننا منتعودش على مود معين


طبعاً اللي بيقرا هيقول اه ده بيهيس علينا وعايزنا نبأه شخصيات مودية


لا انا مقلتش كده خالص انا اللي عاوز اقوله مش ان الواحد يبأه مودي لكن لازم تغيّر من ارتباطك بالناس بمعنى انك مش كل واحد تحطله شوية حاجات بتتكلم معاه فيها وكل مرة تتكلموا في نفس الحاجة كل مرة تتكلموا في نفس الحاجة ده هيبأه ملل فعلا غيّر في كلامك معاه ولو حاجة صغيره جدا وشوف نتيجة التغير ده


الكلام ده مش بس على البشر ده حتى على اي حاجة تانية على بيتك مثلا متخليش ارتباطك بالبيت ارتباط معين بحيث انك تحس بملل منه وفي الاخر متبقاش عايز تشوف بيتك حتى


كنت السنة اللي فاتت كل ماارجع من الكلية بقول يااه انا هرجع البيت ده علشان اذاكر وانام مفيش غير كده وفعلا بقيت بكتئب لدرجة ان انا ساعات كنت بتخانق مع اي حد من اخواتي لمجرد اني اعمل حاجة جديده في البيت ده ""مجنون بأه"" لكن فعلا لما فكرت قلت انا هرجع البيت النهارده الساعه كام يعني هرجع البيت هيبأه في النور وله هيكون ظلمه"طبعا بالنسبالك انته مش فارقه معاك في النور وله في الظلمه لإن علاقتك مع البيت علاقه محدده حاول توسع من علاقتك" طيب هيبأه ايه الوضع في البيت طيب هذاكر في اوضتي وله هبلطج على حد واذاكر معاه في اوضته طيب شكل القعده في البلكونه النارده القمر مكتمل وله هتبأه قاعده مش ظريفه والله انا مش بقول كلام اهبل ولا حاجة دي فعلا حقيقه وانا فعلا اعرف ناس بيكتئبوا وهما راجعين البيت


مثال تاني لما انا رجعت من السفر وقعدت هنا في مصر كانت كل ارتباطاتب مع قرايبي ومع اخواتي كمان شبه مضمحله نتيجة العزله اللي انا كنت فيها وكنت هبدأ احس بملل من الكل وكل مااتضايق اكلم اصحابي اللي كانوا معايا وانا مسافر لحد ماقلت لا انا لازم اتكلم مع الناس دي واحاول افهمهم ويفهموني اكتر يعني كان ليا قريبي كنت كل مااشوفه ازيك عامل ايه تمام الحمد لله بس كنت بحس بملل كل مااشوفه اقول هوه انا مش هقول غير الجملتين دول حاولت اغير من كلامي معاه اعرف ايه مشاكله احكيله شوية عن مشاكلي الشيء اللي خلاني بجد ببأه سعيد لما بشوفه وببأه سعيد اكتر لما بتكلم معاه


يعني بلاش نبأه ناس كتومه ومنكلمش الناس خلونا نتكلم مع الناس علشان نحس ببعض اكتر الناس


--------------------------------------------------------------------


من اول هنا البوست خلص اللي عاووز يتفرج عليا وانا بتفلسف يكمل وبثبتلكم الكلام ده بالرياضيات يكمل " طبعا رياضيات ابتدائي مش اكتر "


--------------------------------------------------------------------


انا هفرض ان الملل ده شخص مغرورجدا وقوي جداااا بحيث ان اي حاجة الواحد بيعملها وهوه مبسوط بيخليها تتعكس عليه علشان هوه مغرور وقوي وطبعا هوه مبيبصش غير على الافعال الكبيره


طيب انا دلوقتي هقول ان الافعال والحاجات اللي الواحد بيعملها اسمها


X


وطبعا الملل اللي هوه البلطجي مع فترة بيقدر بقوته يعمل حاجات


-X


بحيث يبأه مجموع الافعال بتاعة الانسان "الغلبان" بتساوي


X+(-X)=0


طيب احنا هنغير شوية حاجات بسيطه قوييي بحيث نقدر نضحك على الشخص المغرور ده وهنزود حاجات بسيطة جدااا وهنقول ان الحاجات اللي هنعملها


X+x


باعتبار ان اكس الصغيره دي تغييراات صغيره قوي في حياتنا او في علاقتنا مع الناس


و طبعا الملل اللي هوه مغرور غروره هيخليه يفكر في اكس الكبيره وساعتها هيعمل بس

-X


وبالتالي احنا لما هنشوف المجموع لإن افعال الواحد من الواحد وأفعال الملل من نفس الواحد


X+x+(-X)=x


ومع الزمن هنقعد نجمع في ال اكسات الصغيره دي لحد مافي الاخر هنلاقيها


X

وهوه ده الناتج اللي بيخلي الانسان سعيد ومبيحسش بالملل


وعلشان كده الاصدقاء دايما بيكونوا مروا بالمراحل دي كلها وغيروا كلامهم مع بعض وعلاقتهم علشان كده مينفعش صاحب يجيلوا ملل من صاحبه



اسف على الفلسفه