خلونا نفكر بجد



حبيبتي أخشى ان تتلاقى عيوننا


فتهتز وتخفق وتضطرب معها قلوبنا


ويجبرنا الحب على اغلاق جفوننا


وينقطع صوت الحياة في صدورنا


ونتهامس كلمات الحب في احلامنا


ويخشى الشهيق من ايقاذنا


ويتبعه الزفير متمسكاً بحلمنا


فتعزف الدماء فوق شرايننا


موسيقى الحب اهداء الى قلوبنا


فتنفرج معها اساريرنا


ونهتف باسم الحب بأعلى اصواتنا


ثم تتنتهي معها لحظاتنا


ونحزن لأن الواقع هوه حياتنا


وحزنك هو مااخشاه حبيبتي



المهم سبكم من اللي فوق ده كلام بس افتتاحيه لكن الموضوع غير كده



الحمد لله لسه مقابلتش حد بيفكر بالاسلوب اللي انا عايزه واحتمال ملاقيش كمان انا شكلي بدور على حد مثالي قوي


في تفكيره وبرضه مش هلاقي المثاليه بحاول اطور في اقرب الشخصيات علشان فعلا نفسي ننجح ونوصل الى اننا نقلل نسبة الخطأ اللي كنت اتكلمت عنها زمان


حاولت اننا نبأه حاجة في الدنيا نبأه ناس متفهمة اكتر منبقاش سذّج في الدنيا دي العالم بيتقدم واحنا لسه بنتفرج على النمله اللي ماشيه تحت رجلينا وهنفضل طول عمرنا بنتفرج على النمله


كل واحد مفكر ان هوه احسن واحد ومش قابل كلمة من التاني وانا مش فاهم لييييه منفهم ونتفاهم ونتعامل مع بعض نفهم بعض ونحسّن من بعض ونتقدم خطوة على الاقل


فعلا ً زي مابيقولوا ربنا لما وزع الارزاق محدش عجبوا رزقوا لكن لما وزع العقول كل واحد اتكيّف من عقله وبأه طالع بيه السما


انا اللي عاوز اقوله ان في حاجات فيا كويسه وفي حاجات فيا وحشه والحاجات اللي كويسه فيا وحشه عند غيري والوحشه فيا كويسه عند غيري فلازم نفكر مع بعض ولازم نسمع لبعض


بصوا لازم الواحد يسمع للكل ويسكت

اللي دماغنا بتوافقنا عليه نعمله واللي مش بتوافقنا عليه منعملوش بسيطه مش كده

بس لازم الواحد يحكم دماغه مش يعمل اللي في دماغه وخلاص


لإن دي حياتنا واحنا اللي عايشينها وهنعيشها مرة واحد في الدنيا اللي من الدنوّ دي


بحب قوي الناس اللي بتحب حب مراهقه عارفين ليه لإنهم عارفين ان مش ده هوه الحب ومش دي احاسيسه وعارفين ان كل ده مجرد مشاعر مختلطه مش حب بس مش ده اللي بيعجبني فيهم اللي بيعجبني انهم مع انهم عارفين ده ورغم كل ده فهما بيعيشوا اللحظه وبيعيشوا الحب برضه وبيسهروا وبيتوهموا اوهام خياليه ومع انهم عارفين كل ده ومادام هما مبيعملوش حاجة ضد دينهم ولا ضد تقاليدهم " ولازم نكون فاهمين معنى كلمة الدين صح يعني مترحش تقابلها او تتقعد تتكامل معاها في شوية كلام فارغ وتقول انا لسه ملتزم بديني " فيعيشوا حياتهم ولو انا مكانهم والله لو مين جه قال لي كل ده لعب عيال وانا متأكد انه لعب عيال والله هكمله برضه لإني وزنته بعقلي ملقتش فيه مايضر سزى اني هفكر شوية وده ميضرش


اللي عاوز اقوله لازم نوزن كل حاجة بعقلنا وده اللي ضايع من حياتنا دي عقلنا ياعيني مختفي عن الواقع كل واحد مننا عايش في فيلم درامي اللي يقول انا اكتئبت واللي يقول انا زهقت وانا تعبت واللي يقول انا هسيب الدنيا دي واعيش في صحرا "كلمتي بصراحه " واللي يقف فوق البلكونه ويقول حد يوقعني من هنا وانا هسامحه يوم القيامه ويقوم ياعيني الهوا موقعه وتكون جت من عند ربنا وهكذااااا


النهارده وانا راجع من الكلية طبعا بعد يوم عصيب من 6 ونص ل 5 ونص مليان محاضرات ومعامل وطبعا طالع اشتري الورق المضروب اللي بيتباع بره دخلت عند المكتبه كالعاده بضحك للبياعه اللي عارفاني وبهزر دخل واحد صاحبي وقعدنا نتكلم في مادة معينة شوية لقينا واحد تانية واقفه بتبيع اول مرة اشوفها بتقولنا صوتكم لو سمحتم المهم انا قلتلها خلاص اوك مفيش مشكلة طيب شوفيلي حسابي فهيه بتعد فا انا عديت قبلها في دماغي وقلتلها 12 ونص فبصتلي وراحت رمت لي الورق وقالتلي خلاص طيب فا انا شكيت في نفسي لإني مكنتش مفكر انها هتعتمد على كلامي رحت عديت تاني طلعوا 13 فقلتلها لا دول 13 مش 12 ونص المهم زعقت واتضايقت "طبعا انا معرفش ليه " بس بصراحه جه في دماغي حلين الاول اني ارميلها الورق واسيبها وامشي واهو الورق المضروب مخلصش من السوق والحل التاني اني احسسها من جواها انها غبيه فقلتلها خلاص متزعليش وبهزر وبقول لصاحبي لا ياعم دول تعاملهم صعب قوي احنا بعد كده نجيب من مكتبه تانية وانا بضحك لقيتها قالتلي طيب روح هات من المكتبه التانية فقلتلها طيب انتي هدي اعصابك مش مشكلة انا بهزر هاتي الورق وخدت الورق ومشيت


من هنا بدؤوا اصحابي يعنفوني ويقولولي ليه انته مرمتش الورق في وشها قلتلهم اولا انا بحترم البنيئادمه اللي دايما بتبيعلنا واللي دايما بتعاملنا باحترام واللي جت في الاخر وقالت معلش واهلا بيكم تشتروا من عندنا وهكذا

وثانيا انا فكرت " ولأول مرة افكر وانا متنرفز بالشكل ده فعلا "ا وعرفت اني احسسها انها قليلة الذوق احسا مااطلع انا معنديش ذوق وفعلا حسيت اني عمري مافكرت قبل كده وعرفت اني لما بفكر بطلع القرار الصح اللي اكون راضي عنه قبل اي حد تاني


ياجماعه احنا كلنا بنفكر الحمد لله بس عمرنا مافكرنا صح خلونا نفكر صح ولو في مفاهيم غلط عندنا نصححها علشان نقضيها حياة كويسه بدل ما الحياة تتقلب كابوس على دماغنا


7 Responses
  1. Anonymous Says:

    اول مرة اكتشف انك بتفهم انا مش قصدي اغلط فيك بس والله حسة انك اتصرفت صح لان مش كل واحد هيعاملنا وحش هنقوم نضربه كان زمان الدنيا خربت على العموم موضوع جامد والشعر انا شفته قبل كدة ومعرفتش اقولك رأي الشعر احساسك فيه جامد يا باشمهندس عقبال ما ابقى باشمهندسة يا رب
    نفس الحد اللي من افراد العائلة


  2. WhItE HeArT Says:

    ههههههههه

    عموما انا هعدي اول كلمتين بغض النظر عن اللي حصل امبارح كمان منك ومن غيرك
    وعدين بلاش تدعي على نفسك ايه باشمهندسة دي انتي عاوزه تتعقدي ياماما مش شايفه اللي حاصل لي شايفه كل كلامي بكلم نفسي انا بقيت ماشي في الشارع بكلم نفسي بقيت كل عربية معدية من جنبي اقول دي ماشيه بسرعه كام وتسارع اد ايه بقيت كل ماادوس على الارض اقول انا اثرت بقوة اد ايه لدرجة اني دماغي بقت مغلفه بمعادلات وافكار بمفكرش في حاجةالا لما بوزنها رياضيا انا الموضوع ده ليه اثبات عندي بالرياضه شفتي العقده وصلت فين بس لو كتبت الاثبات محدش هيفهمه غيري وبما اني فاهمه فخلاص


    ربنا معاكي وتدخلي اللي نفسك فيه وشكرا على مرورك


  3. عزيزى
    جميل الشعر الاولانى ودائما نخشى من كل شئ حتى الاشياء الجميله كالحب
    شوف الحياه لازم فيها لحظات السعاده والفرح ولحظات التعاسه والالم ولو مشفناش الحزن مش هنحس بقيمة الفرح
    وكل الناس بتمر بكل اللحظات دى
    بس مفهمتش كلامك اننا كلنا بنفكر بس عمرنا ما فكرنا صح
    اكيد عمر ما الانسان كل تفكيره هيكون صح ولا عمره هيفكر غلط على طول
    اما موضوع النرفزه والهدوء ده حسب الشخصيه اولا وحسب الموقف وبخصوص موضوع المكتبه انتى شيفاها من وجهه نظرك
    ويمكن وجهه النظر التانيه انها فى شغل وانتا وصحبك صوتكم كان عالى والمفروض لما نخش نشترى اى حاجه من مكان نحاول ننجز ومش يكون مكان للحوار بينى وبين اصحابى ده ممكن اللى حصل ونرفزها
    وممكن تكون كانت مضيقه من شئ وده خلاها تتنرفز كده وطالما محصلش اى اهانه ليك يبقا المفروض نتساهل ونتسامح فى الحاجات البسيطه دى
    وانتى صغير انك تقول احتمال متلاقيش اللى انتا عاوزه لسه شويه على الكلام ده وموضوع المثالى صعب لانك شخصيا مستحيل تكون مثالى
    تحياتى يا افندم
    سلام


  4. WhItE HeArT Says:

    حسام شكرا على ردك الجميل

    وجميل كلامك كله بس اولا احنا كنا بنتناقش في هنشتري ايه علشان احنا داخلين نجيب ورق معين وكنا بنتناقش فيه وبعدين معليناش صوتنا وياحسام انا كلامي على التفكير اني بقول اني عمرنا ماهنفكر في كل حاجة صح بس المفروض ان احنا زي ماقلت نتسامح ونفكر ونعيد التفكير وبرضه عمرنا ماكنا مثاليين وده انا عارف وقلته قبل كده

    شكرا ليك ياحسام على مرورك الجميل


  5. Anonymous Says:

    انا بصراحة عجبني الموضوع بس انا حاسة من كلامك انك بقيت مخنوق من حاجات كتير بس انا مش هسألك ايه المديئك بس انت عمرك حد دايئك وسكتله رغم ان الصح انك تسكتلوا بس حلو الموضوع ومتاخرتش عليناانا احجبني الشعر بجد يابشمهندس يلي مدايق نوران


  6. WhItE HeArT Says:

    رغم الاخطاء اللغوية الكتير ورغم اني بكتب لك وانا مخنوق ومتضايق فعلا بس المرة دي سكت ومعملتش حاجة زي ماانتي عارفه عني وزي مابقول دايما الناس بتتغير للأحسن والمعروف ان كل انسان بيبني في شخصيته زي ماهوهو عايز

    شكراً ليكي ومعرفش انتي عرفتي ازاي اني مخنوق ومتضااايق بس كويس ان احنا بنحس ببعض

    حاولي تصححي من اخطائك اللغوية يانورا مينفعش كده

    سلام


  7. kingmody Says:

    الشعر قلتلك فيه رايي قبل كده
    اما الموضوع فبصراحة وكل صراحة انا مفهمتش انت عاوز توصلنا بايه هو ممكن العيب يكون مني
    بسبب اني عندي امتحانات وعاوز انام
    لسه قافل كتاب الكيميا وما ادراك ما الكيميا المهم
    هحاول اقراها مرة تانية بس بعدين انا رديت عشان ميكونش عليا حاجة :p