علاج الملل




اغمض حاجة لما الانسان يحس بالملل ومع الفترة بيقلب معاه بكئابه وشوية شوية بأحباط والموضوع في الاخر بيبأه زي الفل وبيشرف في الاخر في العباسية


بس الموضوع اسهل من كده بكتير الواحد بيحس بالملل وده من التعود وده كلنا عارفينه وحله كالعاده اننا منتعودش على مود معين


طبعاً اللي بيقرا هيقول اه ده بيهيس علينا وعايزنا نبأه شخصيات مودية


لا انا مقلتش كده خالص انا اللي عاوز اقوله مش ان الواحد يبأه مودي لكن لازم تغيّر من ارتباطك بالناس بمعنى انك مش كل واحد تحطله شوية حاجات بتتكلم معاه فيها وكل مرة تتكلموا في نفس الحاجة كل مرة تتكلموا في نفس الحاجة ده هيبأه ملل فعلا غيّر في كلامك معاه ولو حاجة صغيره جدا وشوف نتيجة التغير ده


الكلام ده مش بس على البشر ده حتى على اي حاجة تانية على بيتك مثلا متخليش ارتباطك بالبيت ارتباط معين بحيث انك تحس بملل منه وفي الاخر متبقاش عايز تشوف بيتك حتى


كنت السنة اللي فاتت كل ماارجع من الكلية بقول يااه انا هرجع البيت ده علشان اذاكر وانام مفيش غير كده وفعلا بقيت بكتئب لدرجة ان انا ساعات كنت بتخانق مع اي حد من اخواتي لمجرد اني اعمل حاجة جديده في البيت ده ""مجنون بأه"" لكن فعلا لما فكرت قلت انا هرجع البيت النهارده الساعه كام يعني هرجع البيت هيبأه في النور وله هيكون ظلمه"طبعا بالنسبالك انته مش فارقه معاك في النور وله في الظلمه لإن علاقتك مع البيت علاقه محدده حاول توسع من علاقتك" طيب هيبأه ايه الوضع في البيت طيب هذاكر في اوضتي وله هبلطج على حد واذاكر معاه في اوضته طيب شكل القعده في البلكونه النارده القمر مكتمل وله هتبأه قاعده مش ظريفه والله انا مش بقول كلام اهبل ولا حاجة دي فعلا حقيقه وانا فعلا اعرف ناس بيكتئبوا وهما راجعين البيت


مثال تاني لما انا رجعت من السفر وقعدت هنا في مصر كانت كل ارتباطاتب مع قرايبي ومع اخواتي كمان شبه مضمحله نتيجة العزله اللي انا كنت فيها وكنت هبدأ احس بملل من الكل وكل مااتضايق اكلم اصحابي اللي كانوا معايا وانا مسافر لحد ماقلت لا انا لازم اتكلم مع الناس دي واحاول افهمهم ويفهموني اكتر يعني كان ليا قريبي كنت كل مااشوفه ازيك عامل ايه تمام الحمد لله بس كنت بحس بملل كل مااشوفه اقول هوه انا مش هقول غير الجملتين دول حاولت اغير من كلامي معاه اعرف ايه مشاكله احكيله شوية عن مشاكلي الشيء اللي خلاني بجد ببأه سعيد لما بشوفه وببأه سعيد اكتر لما بتكلم معاه


يعني بلاش نبأه ناس كتومه ومنكلمش الناس خلونا نتكلم مع الناس علشان نحس ببعض اكتر الناس


--------------------------------------------------------------------


من اول هنا البوست خلص اللي عاووز يتفرج عليا وانا بتفلسف يكمل وبثبتلكم الكلام ده بالرياضيات يكمل " طبعا رياضيات ابتدائي مش اكتر "


--------------------------------------------------------------------


انا هفرض ان الملل ده شخص مغرورجدا وقوي جداااا بحيث ان اي حاجة الواحد بيعملها وهوه مبسوط بيخليها تتعكس عليه علشان هوه مغرور وقوي وطبعا هوه مبيبصش غير على الافعال الكبيره


طيب انا دلوقتي هقول ان الافعال والحاجات اللي الواحد بيعملها اسمها


X


وطبعا الملل اللي هوه البلطجي مع فترة بيقدر بقوته يعمل حاجات


-X


بحيث يبأه مجموع الافعال بتاعة الانسان "الغلبان" بتساوي


X+(-X)=0


طيب احنا هنغير شوية حاجات بسيطه قوييي بحيث نقدر نضحك على الشخص المغرور ده وهنزود حاجات بسيطة جدااا وهنقول ان الحاجات اللي هنعملها


X+x


باعتبار ان اكس الصغيره دي تغييراات صغيره قوي في حياتنا او في علاقتنا مع الناس


و طبعا الملل اللي هوه مغرور غروره هيخليه يفكر في اكس الكبيره وساعتها هيعمل بس

-X


وبالتالي احنا لما هنشوف المجموع لإن افعال الواحد من الواحد وأفعال الملل من نفس الواحد


X+x+(-X)=x


ومع الزمن هنقعد نجمع في ال اكسات الصغيره دي لحد مافي الاخر هنلاقيها


X

وهوه ده الناتج اللي بيخلي الانسان سعيد ومبيحسش بالملل


وعلشان كده الاصدقاء دايما بيكونوا مروا بالمراحل دي كلها وغيروا كلامهم مع بعض وعلاقتهم علشان كده مينفعش صاحب يجيلوا ملل من صاحبه



اسف على الفلسفه
11 Responses
  1. Anonymous Says:

    موضوعك حلو لاني علطول حاسة بالملل انا لما بفكر اني اعمل حاجة جديدة مش بحس اني مرتاحة لاني حاسة اني هبقا مبسوطه لمااعمل الحاجه القديمه الي انا تعودت اعملها انا اقصد ان الانسان كله ملل انا لما بتخنق مبلقيش حد اتكلم معاه الى اصحابي لانهم هم الي هيفهموني بجد لاكن اروح اقول لاختي او اخويا ولاحتى قريبي هيتريقوا عليا جامد وانا بقول ان الملل علاجة الطلوع من البيت واخرج مع الي انا احب اخرج معاه او انا متعودة اني اخرج معاه لاني بمبسط معاه او ضامنه اني همبسط معاه اناعارفه ان دة الملل نفسه انا طولت عليكم بس انا حكيت الي انا عاوزاة لوسمحت يا محمد انت بتتاخر علينا بموضيعك وانا عنفسي عاوزة موضيعك تكون سريعةالي يؤيدني في الرض يكتبلة ...نوران


  2. WhItE HeArT Says:

    نوران شكرا على كومنتك الجميل لكن الملل مش علاجه الخروج من البيت ولا علاجه بس انك تكلمي اصحابك بس انتي ممكن تكلمي اختك او حد تاني وتتناقشي وتشوفي رأيه ومش عيب انه يقول لك الموضوع غلط لإنه ممكن يكون شايف حاجة انتي مش شايفاها ونسمع ونتكلم ونتعلم شوية لغه الحوار بالعقل علشان منحسش بالملل

    انا مبتأخرش يانوران في الموضوع بس انتي عارفه اني ببأه مشغول وعلى ماارتب الموضوع وهكذا وشكراً على اهتمامك

    يؤيدني في الرد <--- بتتكتب كده

    شكراً ليكي


  3. الباشمهندس الجامد جدا


    ايه الكلام الجميل دا والله كلام زى الفل

    كويس ان انت حاولت كدا مع نفسك والاحسن انك نجحت

    ربنا معاك دايما وتقدر تتغلب على مشاكلك بتفكير سليم زى دا


    والفلسفة ليه تتاسف عليه

    والله توحفه

    استفدت فعلن من كلامك اللى كله تفاؤل


    اخبار حياتك ايه بقى؟

    وشيرين اخبارها ايه؟

    والواد شرى عامل ايه؟

    سلملى عليه اصلى مشغولة اليومين دول حبة

    خالو تعبان اوى وبروح له كتير

    ادعيله يا محمد

    خلى بالك من نفسك ومن قريبك اللذيذ اللى بقيت بتحبه


    يلا سلاموتو


  4. WhItE HeArT Says:

    ياااسلاااام استني بس اروح البس النضاره علشان اتأكد مين عندناا

    عموما منوراني دايما يادكتورة

    وشكرا على كلامك الجميل ده والله بس هما لو يسيبوا بتوع هندسة يفكروا هيطلعوا احلى شغل بس ياعيني مبنلحقش

    التفاؤل مفيد بس الواحد مينساش ان اكيد في فترة بيبأه نفسياً مش متظبط وكل الناس بتمر بالمرحله دي بس الانسان العاقل هوه اللي بيعديها بسلام

    يارب الكل يكون نفسيا متظبط

    وسلامك للبنيئادم يوصل ان شاء الله

    والف سلامه على خالو ويارب يقوم بالسلامه ياااارب


  5. thinkforever Says:

    موضوع جميل بس شوف نقدر نعالج الملل بالقرب من ربنا ثم التغير المستمر زى ماانت وضحت والموضوع طيب بس انت عرفنى انا مش بحب الفلسفه وبكرها موت وياريت الموضوع القادم يكون اقوى من كده بس ده مش معناه انى مش مبسوط من الموضوع ده


  6. WhItE HeArT Says:

    أحمد شكرا على ردك الجميل ده ياباشا
    وطبعا نقدر نعالج اي حاجة بالقرب من ربنا زي ماانته قلت
    وطبعا فلسفتي اكيد مش هتعجب ناس كتير وهتعجب ناس
    والحمد لله ان الموضوع عجبك وان شاء الله الموضوع الجاي هيبأه اقوى بس انته متحرمنيش من ردودك كده


  7. Anonymous Says:

    اتأخرت في الرد بس المزاكرة ومشاغل الدنيا بقى المهم الموضوع على فكرة جامد بس كا نقصه شعر يا باشمهندس المشكلة الدنيا كلها ملل في ملل مهما حاولت تغير برضه ملل
    نفس الحد اللي من افراد العائلة


  8. Anonymous Says:

    اتأخرت في الرد بس المزاكرة ومشاغل الدنيا بقى المهم الموضوع على فكرة جامد بس كا نقصه شعر يا باشمهندس المشكلة الدنيا كلها ملل في ملل مهما حاولت تغير برضه ملل
    نفس الحد اللي من افراد العائلة


  9. WhItE HeArT Says:

    كنت مستني ردك على فكره بس شكله فعلا مشاغل الدنيا المهم

    انتي ليه باصه على الدنيا بمنظور ضيق قوي الدنيا فيها كتير واللي يتعمل فيها اكتر بس لو احنااكتشفنا ده

    اقول لك حاجة حاولي تكتشفي في نفسك شيء جديد وعلى فكره الانسان طاقاته لاتنتهي مخدتيش كلمة الراجل اللي بيقول ان الطاقه لاتفنى فعلا هوه كلامه صح حتى طاقة الانسان لا تفنى حاولي تكتشفي الشيء الجديد فيكي او حاولي تتغيري زي ماانا قلت بس طبعا لكل واحد مباديئ ميقدرش يتغير فيها

    حاولي وابقي قوليلي ايه اللي حصل معاكي لكن منقلش ان الدنيا كلها ملل في ملل في ملل

    شكرا لردك


  10. kingmody Says:

    موضوع جميل اوي اوي يا محمد
    وانا مع احمد عشان ربنا قال
    } ومن أعرض غن ذكري فإن له معيشة ضنكا }
    ومن ضمن الضنك فيا لحياة انك تكون ملان
    فاشترك مع احمد في الراي ان الملل بيروخ بالقرب من ربنا وبعدين زي ما انت قلت
    وبقلك ايه
    سلملي على الواد شريف جامد عشان واحشني اوي


  11. WhItE HeArT Says:

    شكرا لردك يامحمود

    والحمد لله ان الموضوع عجبك

    وسلامك هيوصل شريف ان شاء الله