الفرعون المصري


أخيرا وبعد عذاب طويل مع النت والسنترال "طبعا بيحبونا ومبيحبوش يقطعوا التليفون عننا خالص" رجعلي النت

وقلت قبل ماالسنة تخلص على خير ان شاء الله وكل سنة وانتم كلكم طيبين والسنة الجايه تكون احسن واولادك يامصر يوصلوا 120 مليون كده ان مكانوش وصلوا اصلا


قلت اكمل عدد البوستات ل 20 وبعديها هنقطع فترة علشان كليتنا بتحبنا جدا وبتحب تكرمنا برضه زي السنترال بالظبط وعملتلنا امتحانات وعقبالكم يارب


وقلت لرفع الروح المعنوية وسط جو الكئابه اللي اجتاز كل البلوجات من ضمنهم بلوجتي انا كمان اكتبلكم حاجة بسيطه اغير فيها من طريقتي واكتب عن الانسان المصري وازاي هوه انسان عظيم وازاي اتضحك عليه لما سموه بالفرعون المصري




هفضل سايب نفسي مكاني

مين الصح ومين الجاني

قلت انا هتعب نفسي انا ليه

دي فزورة وافكر ليه

قتلت التفكير جوه دماغي


انا اللي بمشي وانا في مكاني

مهو كل ماهمشي كل ماهعرف

وكل ماهعرف كل ماهبكي

مش الهدف اني انا امشي

اديني بمشي وانا في مكاني


وبغمض عيني علشان مشوفش

بحلي الضلمه انا جوايا

وبنور طريقي انا بكايا

يمكن تحايل انا مقصدش

بقتل نفسي وانا معرفش


شايل لساني انا جوه بقي

طبعا امال هشيله انا فين

الإيد قصيره وبرضه العين

اصلهم علموني وبرضه قالولي

اللي لسانه يطلع مش انسان

بيصنف فصيله من الحيوان

قلت خلاص انا هفضل ساكت

وبالمصري انا هفضل صامت

وبالعربي انا هفضل سيلنت


قالو العلام هوه اللي يكسب

رحت اتعلم يمكن اكسب

تتصل أكتر تكسب أكتر

فضلت الساعه انا على الفون

مبروك كسبت...الله أكبر

تلت دقايق من فودافون

وانا المصري ابن النيل

معايا الخط من موبينيل


يخرب عقلك ياام سعاد

ناشره غسيلك فوق عنيا

مسمععتيش عن الجاذبية

ده اللي قاله الحج نيوتن

لما وقعت عليه التفاحه

واديني انا النهارضه بقوله

لما المية وقعت عليّا


مفضليش من الحواس

غير السمع والاحساس

هساهم بيهم وسط الناس

وهفضل سايب نفسي مكاني


منا اللي قالو عليا الاسم

المصري هوه الاصل

مصري مين ياعم الحج

الاصل جدودنا ماتو زمان

ماتو برضه من الحرمان

Comments

هلكتنى من الضحك والله
وبالذات ماية ام سعاد دى
ربنا معاك
ويوفقك وينجحك يارب
خالص تحياتى
walaa said…
يااااه بعد الغيبه الطويله ديه راجعلنا بكل التفاءول ده بس انا مش معاك بكل التشاؤم ده احنا لسه شباب وفى ايدينا نغير حاجات كتير لما نسكت ونمشى بين الناس مين اللى هيغر الفساد ده

وربنا يوفقك فى الامتحانات
ايه ده؟
ايه الحلاوه دى؟
بس غيبه طويله اوى يا ريت متتكررش يا باشا
تحياتى
اول حاجة كل سنة وانت طيب
عام جديد سعيد عليك

تانى حاجة مش تغيب كتير
حاول تكتب وتقول لنا اخبارك ايه

كلامك جميل اوى

ربنا يوفقك

تحياتى لك دوما

كاميليا
Anonymous said…
الموضوع عجبني لانك ساكت وصامت وسيلنت وانا كنت بقول اني عاوزه اسألك سؤال شمعنا ام سعاد ليه مس ام محمد السؤال ده محيرني قوي انا عاوزة الجواب يافرعون عصرك...
منى said…
يا سلام
بقى هو ده التفاءل بتاعك؟
بس بما انك داخل على امتحان
ادينى بقولها لك اهو
اتفائل احسن لك
تحياتى
WhItE HeArT said…
دوحا

الحمد لله ان الكلام ضحكك اما مية ام سعاد دي انا جربتها كتير

وربنا معانا جميعا

تحياتي ليك وبيسعدني تعليقك دايما
WhItE HeArT said…
ولاء
انا بأسف لتغيبي وان شاء الله مش هتتكرر

اما التفاؤل والتشاؤم الحمد لله احنا الشباب الحمد لله قاعدين متفائلين ولا بنغير اي حاجة ولا حتى بنغير في نفسنا في الحقيقة احنا فعلا ساكتين وماشيين جنب الناس

ربنا يوفقنا كلنا

اسعدني ردك وتحياتي
WhItE HeArT said…
شريف طلال

حلاوة ايه ياشريف انته اللي حلو والله

الغيبة ان شاء الله مش هتتكرر

تحياتي ليك واسعدني ردك
WhItE HeArT said…
كامليا

وانتي طيبة وعام اسعد عليكي وعلى كل المسلمين يارب

ان شاء الله مش هغيب كتير وانا اخباري تمام الحمد لله

كلامي جميل ده من ذوقك

يسعدني ردك دائما وتحياتي
WhItE HeArT said…
نوران

الحمد لله ان الموضوع عجبك ويارب مكنش ساكت ولاصامت واتكلم يارب

ام سعاد علشان انا في وجهة نظري ومحدش يزعل
ان الرجاله ماتو في 73 زي مابيقولوا ولو كان فيه كنت قلت ام محمد

تحياتي ليكي يانوران ويسعدني دايما وجودك
WhItE HeArT said…
منى

شفتي انا متفائل ازاي انا لو مكنتش متفائل كنت كتبت كلام تاني بس ده علشان ابسطكم بس مش اكتر

انا داخل على امتحانات ومتفائل وسعيد جدا السعاده عماله بتتنطط على الكيبورد اهي

ردك اسعدني وتقبلي تحياتي
عزيزى
الكلام جميل وبسيط وساخر
بس احنا مالنا صحيح ومال الفراعنة مش نخلينا فى دنيتنا اللى عيشنه
اتمنا تيجى تعلق على اخر موضوع للاهمية تعليق واضح وصريح وقاطع
سلام

Popular posts from this blog

الحب بات ... مصنوع من قهر السكات

تساؤلات

ساعد نفسك