سلام

 
سلام


النهارده لمست اديكي

مقدرتش اخبي عليكي الرعشه

اتاخدت من وسط الدوشه

اتاخدت لسحر عنيكي

سحر النني ورمش العين

مش قادر اتحمل الاتنين

خايف اسلم وله اتكلم

يطلع صوتي ضعيف متألم

رجعت اسمع تاني الوَش

بس المرة دي مش من بره

وش في قلبي انا من جوه

صوت النبض بان عالوش

بان في اديا قبل سلامي

بان في ملامحي قبل كلامي

لو حساه مش راح ألبي

ولو شايفاه انا راح هخبي

انا مش خايف ادوب انا فيكي

ولا خايف اسهر اناديكي

انا خايف عليكي مني

انا خايف عليكي اكمني

حاسس اني عاشق مجروح

حسيت بالهوا قبلك

وتهت من قبل ماقابلك

وبصد الهوا لما يلوح

يمكن عقده وانا بداريها

حبيت واحده ودبت انا فيها

دلوقتي بمشي خايف الاقيها

تهرب مني ساعتها انا روحي

تهرب مني تروح تناديها

مش علشان تتأمل فيها

ولا علشان سحر عنيها

لكن بس علشان كارهاها

نفسها تنتقهم يوم لسماها

شفتي ازاي انا حبي يحير

وفي لحظه ممكن يتغير

صدقيني انا حاسس بيكي

خايف تضيعي وانا بلاقيكي

وخايف بعد مااتمسك بيكي
تجرحي قلبي انا من تاني

عارف نفسي انا وغرورها

مش ممكن اجازف بخساره تاني

ومتعودتش اعيش اناني

وعلشان اهرب من ده وده

واعيش حياتي من غير اماني

لازم اعيشها بالكشل ده
قلبي دايما مش على حق

خدعني ياما وقبلك دق

دلوقتي سيبيني اسحب ايدي

واسلم على بقيت الخلق
25 Responses
  1. مش عارف انت ليه بتحط مقدمات قبل قصيدك

    قلمك رائع ومش محتاج المقدمات دى

    وممكن اراهن على مستقبلك فى الكنابه كمان

    أكيد لى عودة مع المدونة


  2. doha Says:

    السلام عليكم
    اولا كل سنة وانت طيب ياريس
    ثانيا
    ايه الكلمات الجميلة دى
    نصيحتى استمر فى كتابة الاشعار واوعى تزهق تانى
    لانك فعلابتكتب حلو
    اوى
    رابعا تقبل منى تقديرى واحترامى ليك
    خالص تحياتى


  3. Anonymous Says:

    حلو اووى البوست دا يا محمد
    وبجد الكلاام روووعة
    تسلم ايدييك ..


  4. Sylvester Says:

    السلام عليكم
    البويت روووووووووووعه
    وقدرتك على كتابة الشعر أروع


    وأحب أن أنضم أليكم
    مع تحياتيالخاصة
    .............................
    Selvester

    وشكرا

    وكل عام وأنت بألف خير

    ......................


  5. walaa Says:

    كل سنه وانت طيب
    لو حب حقيقى بجد يستهلك متفرتش فيه
    ولو خايف منه متقربش اصعب شىء فى حياة الانسان هى الخساره القلبيه
    وربنا يكرمك ويوفقك

    تحياتى لك ولاء


  6. بجد موهبتك ماشاء الله جامدة اوى ..

    الشعر حلو أوى ..

    وبجد ربنا يوفقك .. وأكيد لييك مستقبل جامد فيه ..

    ربنا يكرمك ..


  7. appy Says:

    كل سنه وانت بالف خير نورة كوكبىىىىىىى بجد ومبسوطه بيك هناك وهناااااااااا
    ومش هقولك كلامك رائع لان الحاجه اللى بتعبر بتكون اكتر من رائعه


  8. يا سيدي
    دي معلقه يابني
    بحب قوي الرتم السريع في الشعر الحر
    بحسه منطلق وماعليهوش قيود

    بص بقي يا سيدي
    بصفتي خبره يعني:)
    ايوه بنحب تاني
    وساعات ثالث كمان
    وبيكون حب حقيقي
    الحب الاول مابيتنساش مش اكتر
    بيتحول لحاجه كده بين الحب والذكريات
    لما بتشوفه بيتحرك قلبك حركه شوق
    اتاكد بس ان اللي فات انتهي فعلا
    وان الجديد حب بجد
    ودوس يا صاحبي
    بس حافظ عليه المره دي

    بجد بجد شعر حلو واحساس عالي

    اه ايه معملتش حاجه السنه اللي فاتت؟
    دور هتلاقي
    ونظم نفسك السنه دي علشان تبقي احسن من اللي فاتت
    فرق كبير بين لوم الذات وجلدها
    يارب تكون وصلت
    تحياتي وسلام


  9. WhItE HeArT Says:

    تامر سليط

    والله المقدمات بس علشان اقول لكم كل سنة وانتم طيبين وهحاول اختصر بعد كده ان شاء الله

    وشكرا لردك الرائع وياريت تكون زياراتك دائمة


  10. WhItE HeArT Says:

    عزيزي دوحا

    وعليكم السلام

    وانت طيب وسعيد يارب

    الكلمات جميله بس من ذوقك وان شاء الله مش هنبطل كتابه هيه الحاجة الوحيده اللي بتخلي بالنسبالي للحياة طعم

    وشكرا لمجاملتك الجميله دي

    وشكرا لردك الرائع

    تحياتي لحضرتك


  11. WhItE HeArT Says:

    حد معرفش هوه مين بس شكله يعرفني

    طريقتك مش غريبة عليا والحمد لله ان الكلام عجبك ياريت اعرف مين حضرتك

    تحياتي


  12. WhItE HeArT Says:

    سيلفستر

    الحمد لله ان الكلام عجبك

    اسعدتني زيارتك وياريت تتكرر

    وتحياتي لحضرتك


  13. WhItE HeArT Says:

    كل سنة وانتي طيبة ياولاء

    كلامك وصلني وفهمته ياولاء لكن دي مش تجربتي الشخصية ولكن انا بتعايش معاها كفكرة وده رأيي في الموضوع وده احساسي لو قدرت اعبر عنه لكن مش شرط يكون الشاعر حاسس التجربه علشان يكتب فيها لكن بيتعايش مع الجو

    لكن لو جه الحب الحقيقي اكيد مش هفرط فيه

    تحياتي لحضرتك


  14. WhItE HeArT Says:

    محمد حمزة

    اسعدتني زيارتك وردك الرائع وياريت تكون زيارة دائمة

    تحياتي لحضرتك


  15. WhItE HeArT Says:

    appy

    كوكبك منور بيكي اكيد

    واكيد انتي اللي نورتي هنا واسعدني وجودك وردك وشكرا لردك الرائع واتمناها متكنش زيارة اليوم الواحد


    تحياتي لحضرتك


  16. WhItE HeArT Says:

    حصان بري

    اولا اسعدني وجودك جداااا

    ثانيا فعلا بنحب تاني وتالت ومبننساش ومعاك في كل حاجة الا ان يكون الكلام ده تصوير لشيء جوايا لإني زي ماقلت لولاء انا عشت الفكرة وحطيت رأيي واحساسي ودي مسؤولية الشاعر وارجو اني اكون قدرت اوصل لكم الاحساس بتاعي وحتى لو مش عايشه واكيد لو لاقيت حب حقيقي برضه مش هفرط فيه

    بس اعتقد ان الحب ضاع في الزمن اللي احنا عايشينه مش متبقي منه غير شوية الاحاسيس اللي احنا بنكتبها دي

    تحياتي لحضرتك
    ويسعدني دائما وجودك


  17. اول حاجه اتمنى انك تكون عملت حلو فى الامتحان

    وبعدين

    خايف من الوقوع فى الحب
    وتمتلك مثل ذلك القلب؟

    كلماتك جميلة ..
    بس مش يتهيآلى انك بتكره الحب السابق
    القلب الابيض مش ممكن يكره..
    هم شوية دخان من نار جرح
    اول مايجى الفرح ..
    سيتبدد الدخان .. وتصفى الروح

    تمنياتى بكل السعاده
    والنجاح


  18. secretlove Says:

    السلام عليكم واحشنى كتير والله وواحشنى مواضيعك انا بالى زمن مدخلتش على البلوجات ولما لاقيتك نزلت حاجات جديده قولت لازم ادخل اقرا الموضوع حلو بس ياريت تقلل لون "عتاب الحب مع الانتقام" يكون افضل ليك يعنى غير شويه الموضوع رائع وعجبنى بس اعتقد كان عايز سويه تظبيط فى القافيه والله اعلم فوانا فى انتظار الجديدليك


  19. WhItE HeArT Says:

    كاميليا

    شيء طبيعي ان الانسان يكون خايف بعد ماخسر جولته الاولى وخصوصا ان عدد الجولات في اللعبه دي محدد جدا ومين عارف يمكن تكون الجوله اللي جايه الاخيرة وياصابت ياخابت

    بس هقول لك حاجة انا من طبعي اني انسان بجازف وبغامر حتى لو نسبة الفوز قليلة انا بجازف لكن انا فعلا مش عارف انا كتبت كده ليه وحاسس ان ممكن اكون وانا بكتب اي شعر ببأه شخصية تانية او بفكر بطريقة تانية لكن لو في الحقيقه انا هجازف بس لازم اتأكد ان ده حب حقيقي ومش مشكلة بأه بعدها الحب يعيش وله يموت مش هتفرق معايا

    تحياتي لحضرتك بس برضه زي ماقلت لولاء وحصان بري الكلام ده مش ليا ده بس
    انا بتقمص المشاعر وبعيشها مش اكتر

    حلوه جدا حتة الدخان والروح دي

    تحياتي لحضرتك وزيارتك الرائعه


  20. WhItE HeArT Says:

    secretlove

    ياعم غيبتك مع انها طولت بس تتعوض ان شاء الله
    بس انته ليه بتسميعا عتاب الحب مع الانتقام بيتهيألي متجيش يااما عتب في الحب يااما انتقام او يمكن قصدك يكون الانسان حيران بين الاتنين اه ساعتها ممكن نسميها بالاسم ده وان شاء الله نحاول نقلل من اللون ده مع اني بحبه جدا

    اما عن القافيه فاانا كاتبه من الشعر الحر اللي فيه حركة بس برضه واخد باقالي من السجع وهتلاقي فيه سجع لو انته ركزت بس

    تحياتي لحضرتك ودائما ماتسعدني زيارتك


  21. منى Says:

    بقى كل ده حصل وانت بتسلم؟

    بيتهيقلى لو حصل خسائر سابقه
    مش معناه اننا خلاص ملناش نصيب من الدنيا
    المهم متكررش الاخطاء ونعرف نختار صح ولو العيب فينا نحاول نصلح نفسنا مش دايما نتهم الاخرين بانهم خاينين
    تحياتى
    وربنا ينجحك يا بنى فى الكليه والدنيا


  22. mohaawad8 Says:

    بجد بجد كالعادة داخل اشوف مدونة اللي علق عندي بس بجد ما صدقتش نفسي وانا باقرا
    بجد شعرت معاني جميلة واحاسيس مش طبيعية احاسيس حركت كل ذرة فيا قاعد علي الجهاز بس سابح في سماء الكون بجد انا مش عارف اقول ايه وندمان علي اني ما كنتش قارئ دائم عندك بس من دلوقتي انا هبقي قارئ متردد دائما مش مجاملة بس عن حق

    وبجد اشكرلي اللي نصحك بالكتابة واداني فرصة الطيران في عالم الخيال والجمال

    وبصراحة لساني لم يعد له قدرة علي الكلام


  23. عزيزى
    كل سنة وانتا طيب وبخير يارب
    سواء عاشق مجروح او غير مجروح بدل عشقت هتعشق صح انتا بتقول عشق والعشق اكبر من الحب بكتير
    اتمنا تزونى وتعلق على اخر موضوع للاهمية تعليق صريح وواضح يا ريت
    سلام


  24. This comment has been removed by the author.

  25. هاجر Says:

    اشعارك رائعه، فعلا مميزه و جميله