بس انتي بتبعديني.... انا عشت بستناك



حبيبتي

 لمحتك ومعرفتكيش 

وبصتيلي ومشفتنيش

 

ازاي يضيع كده حبنا 

وازاي يهون بينا حلمنا

ده لا انتي انتي ولا انا

لا ده هوانا ولا عشقنا !!؟؟

 

حتى حبيبتي نظرتك 

فيها دمعتك

فيها كدبتي

وكدبتك

 

حتى حبيبتي رقتك 

وضحكتك

بانت فيهم

قسوتك

 

ليه حتى ألوان طرحتك

مش هما اللي عشقتهم

وفي احلى شعر وصفتهم


حتى حبيبتي السلسلة 

اللي عليها  البسملة

انا مش لاقيها

انا فيكي بدور عليها

 

ليه ياحبيبتي بتهونيني

و بكل مافيكي بتجرحيني 

لسه الامل جوايا باقي 

بس انتي بتبعديني

("محمد"WhItE HeArT)

 

حبيبي


الحزن مالي العين

والضعف غلبنا احنا الاتنين

والحب اهو ضاع من سنين


بإيديك قتلته

وبإيديا دفنته

 

جاي بتدور فيا عليه!؟

جاي بتسأل فين تلاقيه!؟

كان فين قلبك لما باعني

وف لحظة طيش كسرني

 

عشت بستناك ،،

وبقلب ف الصور

قلت يمكن اللقى ،،

يجي ف القدر


وأما شفتك ..

شفت فيك ،،

سنين عمري الي ضاعت

شفت فيك ،،

قسوة الزمن الي بانت


كان لازم قلبي يقسى

وف لحظة ضعف ينسى


قلبي مات من زمان

ماتت معاه السلسلة

ودفنت وياه البسملة


والي لسا معايا عايش

حب شلته من زمان

قلت قلبي ده مش مكان

 

..قتلت قلبي..

 

وعشقت حبي 

وخبيته

ضميته بروحي

ودفيته


ده لا حد ف الدنيا يقدر

يجي عليه او يكسر

حب عايش جوايا

وبيكبر


(أميرة الاحزان"سحر")

 

ده كان دويتو

فكرة فكرنا فيها ونفذناها انا وزميلتي في المدونة سحر يارب تعجبكم

11 Responses
  1. Unique Says:

    دويتو جميل جدا .. تسلم ايديكم
    :)


  2. جميل جدا
    الاسلوب الارتجالى
    الى بينكم فى القصيدتين
    ومحاولة جميلة اوى للرد على بعض
    بنفس الاسلوب تقريب


  3. secret-love Says:

    بجد يامحمد انت عارف راى
    بس الكلام جامد وسحر بشكرها كتيير جدا لانها بجد ابعدت تحياتى ليكم انتو الاتنين


  4. تحفه بجد وايت هارت تسلم ايدك وكمان اميره الاحزان ماشاء الله عليها تسلم ايديها
    ديو رائع بينكو ..والكلامات متناسقه ومعبره جداااااااااااااااااااا
    تحياتي ليكم


  5. والله كرهت الرومنسية ولكن


  6. راااااااااااااااااااااااااااااااااااااائعه جدا جدا جدا
    من هنا لبكره رااااااائعه بجد


  7. Anonymous Says:

    عاجبني اسلوبكم جدا .. وعجباني فكرة الدويتو ، ياريت تتكرر كتير ..

    تسلم ايديكم :)


  8. كلام جميل

    تسلم إيديك

    دمت مبعا و بخير

    تحياتى


  9. Bancea Says:

    دويتو جميل جدا
    انا لسه جديدة ف عالم المدونات وليا مدونة ع قدى بس عجبنى اوى


  10. ميرام Says:

    انا اتغيرت ...
    بقى الاحساس مالوش معنى ..
    حاجات عمالة تتكسر ..
    حاجات أكتر بتوجعنا ..
    انا اتغيرت ..
    وانا عارفة ان انا بخسر ..
    مفيش مكسب يرّجعنــا
    ..



    حسيتها وانا بقرأ

    جميل اللي بتكتبوه
    الاحساس عالي قوووي ..
    الوزن اختل شويتين ...
    لكن بجد جميل
    منتظرة الجديد

    تحيتي


  11. رشا Says:

    انا عارفة انه تعلييييييييييييييييقي متاااااااااااخر جددددددددددا
    لكن دويتو عمري ماسمعت مثلة
    والله والله جميل تحفة
    ربنا يوفقكم انتو الاتنين ويوفق الجميع
    تقبل مروري
    بعدين ايه الغيبة دي كلها 5 شهور مكتبتش ولا قصيده
    ازاي شاعر مثلك لسة ماكتب ولو نص قصيده
    عسى ان تكون بخير ومتشوفش وحش
    تقبل مروري.
    سلامي