اعملي معروف


-------------------------------------------------
تحديث
مش قلتلكم انا شكلي هحب التحديثات دي
المهم الساعه دلوقتي 9 الا عشرة صباحا
وانا امتحاني الساعه 1 ونص ظهراً
ادعولي من قلبكم
وبعتذر على اني الفترة اللي جايه مش هقدر اتابعكم
وهرد على تعليقاتكم كلها لما ارجع ان شاء الله
وبجد هتوحشوني جدا
ارجوكم اعذروني
وطبعاً تدعوا
------------------------------------------------------
دي اهداء لمدحت محمد لإنه قال لي كفاية ضرب ضرب


قصده يعني حزن حزن


وعلشان كده انا بهديله دي وياريت بجد ميقوليش حزينة برضه


هنتحر بجد




--------------------------------------


اتعودت اتأمل فيكي


ثانية بثانية


واما تحس بيا عنيكي


اداري عنيا الناحية التانية






واعمل ال ايه مشغول


بأي حاجة سخيفه سقيمة


جنب جمالك قليلة القيمة






وتبعدي عينك ال نسياني


وارجع بعيوني انا من تاني






واتمنى اللحظة حبيتي تطول


واتملى ف سحرك بذهول


وقلبي بيعيد ويقول


ان جمالك مش معقول





والناس بتهاتي وتنادي


مالك ياابني السعادي


مش عارفين اني ف وادي


بس وادي غير الوادي






وللوجود من تاني بعود


الاقيني عيني ف عنيكي


من غير لا حواجز وقيود


واقولها انا لنن عنيكي


ياحبيبتي مشتاق انا ليكي





مش قادر اعمل مشغول


والنظرة عماله بتطول


واسهر ليلي لنفسي اقول






لإمتى ياواد تفضل مكسوف


واقنع نفسي انك حساني



واجي اقول لك احس بخوف


وفبعادك انا بلقاني



غريب حقيقي ومش مألوف


متريحيني اعملي معروووف



--------------------------------------

دي اتكتبت الساعه 3 ونص بالليل بعد ماهلوست شوية مع الرياضه الهندسية

وحسيت اني داخل على امراض من المذاكرة فكتبتها تفريغ لبعض الرغبات المكبوته

ههههههههههه

مش بس البنات هما اللي عندهم رغبات مكبوتة

سامعاني ياآبي







46 Responses
  1. السلام عليكم
    بجد بجد بجد الله يسامح الامتحانات الي عملت فيا كدا
    معقووول تنزل كذا بوست كدا واشوووفهم كلهم متأخر
    بس بجد بجد بجد كلام رووعة وخصوصا اعملي معروووف دي فعلا عندو حق صحبك بصرااااحة
    بس فعلا تسلم اييديك
    تقبل مروري ...


  2. بجد والله المره دي عجبتني جدا وعجبتني فكرتها اوي
    اوقات النظرات بتكون احلى ما في الحب
    ويارب بقى تعمل معروف هي هههههههههههههههههههههه
    بس بجد جميله يا محمد تقريبا اسمك كده صح
    تحياتي ليك


  3. اية الكبت الجميل دة
    بس ولا يهمك
    مدام الكبت بيطلع كلام حلو
    تحياتى


  4. secret-love Says:

    ياباش والله العظيم كلامك جامد جدا ولتانى مره على التوالى بحس انها برده مكتوبه ليا ايه حكايتك يابوب براحه علينا شويه
    ياريت تدخل تقرا للمدون الجديد no more هتلقيه عندى فى التعليقات


  5. السلام عليكم
    ربنا يعينك ويوقيك على المزاكرةوكفاية انها دافع لكتابة كلماتك الجميلة
    تحياتى لك


  6. اعمل معروف انت وبلاش فضايح يا بنى رغبات مكبوته اية احنا ميه ميه ولا فراخ الجمعية
    جمعية اية هى مش موجوده اصلا
    حلوه اوى يا ابيض القلب انت
    تحياتى


  7. ميرسى ياعم على الاهداء

    بس الناس هيفهمونا غلط كدة يابنى

    ههههههههههههههههه

    بجد الكلمات رقيقة اوى وتحفة

    احلى من الحزن ياراجل

    ياريت تكتب كدة على طول

    بجد

    البوست راااااااائع


  8. NOURAN Says:

    يا عم ياعم ايه ده كله انا بردو من رأيي تخليك كده شويه


  9. كتبت احد موضوعاتى وسوف ترى افكارى

    تحياتى

    عز

    سلاااااااام


  10. Unique Says:

    رغبات مكبوتة !! ورا الابداع ده كله

    تحياتي للهندسة


  11. ميه ميه واللهى
    و دى مش حزاينى دى لذيذه جداً
    و على فكره اغانى الحب السعيده بتبقى اصعب من الحزاينى بكتير
    كلام الفراق و العذاب معروف و سهل
    بس القصص الى زى دى بتظهر الموهبه اكتر بكتير
    اهنيك عليها
    و تحياتى


  12. Anonymous Says:

    صديقي العزيز صاحب الألب الطيب

    قصيده جميله و كلها رقه صديقي

    ربنا يوفقك في الامتحانات و تعدي الأيام دي علي خير انشاء الله
    الصراحه كل كلمه من كلمات القصيده روعه و لوحدها حتعوز يتكتب فيها اشعار
    انت موهوب صديقي ربنا يوفقك دايما
    بتمنالك يوم سعيد


  13. السلام عليكم
    دى اول زيارة ليا
    المدونة جامدة اوى
    انا بحب الشعر العامى وبحترمه جدا
    كلماتك جميلة ومعبرة
    انا عامل مدونه بكتب فيها شعر عامى برضه
    يا ريت تزورنى وصدقنى هتعجبك

    سلالالالالالالالالالالالالالالالالالالالالالالام


  14. كلمات جميله فعلا
    الرياضه الهندسيه ليها تأثير حلو اهه
    على فكره
    الصوره اللى انت حاططتها
    بتاعه الكارتون دى ده فيلم حلو قوى وانا بحبه جدا
    بالضبط زى ما حبيت كلماتك
    تقبل مرورى
    احييك


  15. مدونتك حلوة قوى يا مدحت

    دمها شربات

    اى رأيق فى التدوينة الجديدة

    تحياتى

    (عز)


  16. منى Says:

    هى المذاكره بتطلع الكلام الحلو ده
    طب الحق بقى اعمل كام بوست وحوشهم قبل الامتحانات متخلص
    تحياتى


  17. gannah Says:

    تحياتى لمدونتك


  18. ro7 Says:

    ما شاء الله
    جامدة دي بقي تجربة جديدة
    مش قولنا نهدي شوية
    دي ورا دي ورا دي
    صحتك انت لسة طالع من
    خناقة جامدة
    ومبسووووووووووووطة جدااااا
    انك مش حطيت اغنية
    ربنا يباركلك ياشيخ


  19. mohamed Says:

    sada2ooh ya regala da a3ad mezanebny ma3ah el sa3a 3:30 yesama3haly bas begad walahy elwad da tamam we el she3r da men albo es2aloony ana (he3 he3 he3) walahy el bostat kolaha to7fa we atmanalak el naga7 3alatoool


    Helmy


  20. WhItE HeArT Says:

    ان شاء الله هرد عليكم كلكم قريب

    اعذروني بجد امتحاناتي بهدلتني


  21. ربنا ينجحك و ينجحنا و يوفقنا جميعا ان شاء الله
    كلامك جميل
    تحياتى


  22. حلوه قوى

    واجمل ما فيها .. انها كالعزف

    يعنى فيها موسيقى حلوة



    ملاحظاية
    ذاكر كويس قوى علشان نعملك احتفال لما النتيجه تظهر
    ان شاء الله

    تحياتى


  23. عزيزى

    انت هتخلينا ندعى تكتر رغباتك المكبوتة

    حلوة وليها معنى جميل

    والجملة دى حلوة اوى ولذيذة


    اتعودت اتأمل فيكي

    ثانية بثانية

    واما تحس بيا عنيكي

    اداري عنيا الناحية التانية

    تحياتى

    سلام


  24. جديدة دي ومختلفة عن اللي قبل كدة
    ايوة كدة خللي قلبك ابيض :)


  25. ساعات قليلة لنتحد ولو لدقيقة
    الساعة الرابعة عصراً نرسل رسالتنا الأخيرة
    http://kawlansadida.blogspot.com/2008/05/blog-post_24.html

    26.05.2008


  26. freedom Says:

    بالتوفيق بدراستك و انك تحبي كتب الهندسة نصف الطريق.... و القصيدة final fantasy كمان


  27. بص يا عم انت خليك طول السنه ذاكر وطلع لينا ابدعات زى دى حلوه قوى بس لما ترجع راجعها شويه تعاديل بسيطه وتبقى احلى بكتير ان شاء الله


  28. Tamer Nabil Says:

    كلمات جميلة كالعادة ياصاحبى


    ربنا يوفقك فى الامتحانات يارب

    تحياتى


  29. appy Says:

    ايه ايون سامعه ايه الرخامه دى انت فظيع موووووووووت
    المهم متاخدش على التحديثات علشان صحتك ياابنى ههههههههههه
    ربنا معاك وينجحك يا رب
    وحلو التفاؤل ده متبقوش انتم والسوياسه علينا


  30. Abo 7anf Says:

    السلام عليكم
    اه الكئابه دى
    دنتا غلبتنى يراجل
    حزن وهم
    فكك
    من الكلام الفوق
    بجد رائعه
    وانا عارف كويس شعور الهلوسه
    انت مع الرياضه
    وانا مع عبد المنعم الهيكل العندى


  31. سكــر Says:

    ربنا يوفقك ويقويك يارب

    على امتحانتك

    اما كلامك

    ماشاء الله عليه

    تحياتى اخى الفاضل

    اخيك احمد سكر


  32. رد على التحديث
    ربنا يوفقك يا باشا
    و ينجحك بتقديرات كمان
    تحياتى


  33. لولا Says:

    جميله اوى القصيده
    ويارب معاك ومعانا في الايام دى ويعديها على خير


  34. Anonymous Says:

    حبيت اطمن عليك
    يارب تكون بخير و ترجعلنا بسلامه ياجميل


  35. mostafarayan Says:

    حلوةالقصيدة
    ربنا يوفقك في الأمتحنات وتجيب تقدير عالي



  36. كوارث Says:

    يا اهلا يا اهلا
    القلب الابيض
    منور المدونة والله
    ربنا يوفقك في امتحاناتك اولا ثانيًا بالنسبة للقصيدة
    القصيدة حلوة جدًا جدًا
    وموزونة ما شاء الله
    ومعناها جميل وكويس التغيير برضه اهو مفيد يعني
    بانتظار الجاي يا باشا


  37. rara Says:

    السلام عليكم ورحمة الله وبركاته
    ربنا يوفقك فى امتحاناتك ان شاء الله
    انما بالنسبه للبوست جميل اوى والكلام الجميل بيجى من الهلوسه اكتر هههههههه
    ربنا معاك

    تحياتى


  38. رحاله Says:

    بسم الله
    السلام عليكم
    بجد احيييييييييييييك على كلماتك ومش حزينه ولا حاجه
    دي رائعه اوى
    وربنا يخلي الرياضه الهندسيه علشان بتطلعلنا حاجات حلوة اهوة
    تحياااااااتى
    جيلان


  39. حلوة اوى اوى بجد مؤثرة اوى تسلم يبو قلب ابيض اتمنى تكون كويس لان بقالك كتير مجتش عندى


  40. Tamer Nabil Says:

    اخبار الامتحانات اية

    ربنا معاك

    تحياتى


  41. ايه يا عم كله الرومانسية دى اللى بتفرفر من البوست...

    ربنا معاك فى الامتحانات...

    هحاول ارجع ارد هنا تانى..:)


  42. سمرا Says:

    انا مش حعلق
    عشان انت مش ناقص كفايه عليك الامتحانات


  43. wael Says:

    جامده ابداعات الامتحانات
    بجد حلوه اوي


  44. walaa Says:

    ارب ربنا وفقك فى امتحاناتك وتنجح بتقدر كمان
    ويدم عليك الحب والفرح يارب


  45. Jorge Says:

    Hola amigo: quería invitarte que visites el blog que estoy realizando con mis alumnos de segundo año de la secundaria sobre LA DISCRIMINACIÓN.
    http://nodiscrimine.blogspot.com
    Tema arduo e interesante.
    Seguro será de tu agrado.
    Tu aporte será valioso
    Un abrazo desde la Argentina.