حتة مقابله








ساعات الانسان يحب انسانه قوي



ويتهيألي ان لو هيه بادلته حبه هوه ده اقصى امله ومناه في الدنيا دي



وساعتها هوه هيعيش الدور ويجري هنا وهناك فرحان قوي وطبعا يروح يشتري شرايط عند الحليم من أول بهواك لحد قارئة الفنجان ويقعد يسمعها ليل نهار وياسلام وكإنه اخترع اختراع وخلاص خد براءة اختراع

وللأسف دايما الانسان مش بيبص للي بعد الحب

هيروح لأبوها ازاي وهوه اساسا حيلته ايه وله شهادته ايه علشان على الاقل يخطبها

وهوه طبعا ناسي كل الكلام ده وطاير من الفرحه لحد ماتيجي حبيبته بعد ماطبعا وداها حدايق مصر كلها

وراحو جنينة الاسماك وعاشو الدور مع عبد الحليم برضو



تيجي تقول له حبيبي مش ناوي بأه تكلم بابا ؟؟؟



اوبسسسسسسسسسس



هوه عمره مافكر في الموضوع ده ولا عمره فكر هوه معاه ايه ولا بيملك ايه اساسا ده حياله بياخد مصروفه من ابوه



يبدأ بأه القلق يطنطط على وشه



ويقول لها طيب اديني فرصة اكون نفسي (كالعاده كلمت المصريين كإنه انسان مش متكون ورايح يعمل عملية ويكون نفسه) 4 سنين وله 5 خمسه كده اكون ظبطت المواضيع



حبيبته :: يانهار كله ألوان ده انا امبارح صاحبة ماما كلمتها على واحد عاوز يتقدم لي



الواد الحبيب :: مين ده قوليلي بس عليه ( كإنه هيروح يقتله ) ؟؟



حبيبته :: مش مشكلة مين... المشكلة هقول ايه ؟؟



الواد :: قوليلهم انك مش بتفكري في الارتباط دلوقتي



حبيبته :: ببساطه كده لا طبعا انا مش موافقه انا عاوزاك تيجي تكلم بابا النهارده او بكره وتحجزني (( كإنها عشرة كيلو سمك )) من اي حد عاوز يخطبني ؟؟



الواد:: ياحبيبتي بس اكيد ابوكي مش هيوافق ومش هيرضى يقابلني

حبيبته :: لازم تيجي



الواد :: *تصعب عليه حبيبته هتضيع من ايده لازم يعمل حاجة * طيب ياحياتي انا هجيلكم بكرة



حبيبتك :: طيب ياحياتي



ويكملو مشوارهم في الجنينه





========== وبعد يومين ================================



راح فعلا زي ماوعد حبيبته لأبوها وللأسف مكنش سأل عن ابوها قبل مايروح

معرفش انه راجل جد وميحبش الحال المايل

المهم



دخل طبعا في الصالون عشرة متر * عشرة متر(كان ممكن نقول 100 مترتربيع وخلاث بس اللي يفهمنا بأه من الدكاترة اللي بيقروا البوست) في أرقى أحياء المعمورة



الواد دخل * اش اش ايه ده اللي انا دخلت فيه ده ده انا عايش مع عيلتي في اوضتين وصاله ومفيش اي مشاكل بالنسبالي ** المهم جه ابوها وباين على مظهره هيبه من بعيد كرفته وبدله من فرنسا

وهوه ياعيني لابس الحته اللي على الحبل ونزل اشترى جاتوه من لابوار ال يعني اشترى الدنيا كلها وجه



طبعا الواد حس انه اتورط

المهم الاب دخل قعد وكان باين عليه بشوش ومفيش مشاكل بيحاول يهدي اعصاب الولد



طبعا الاب ساكت (الطبيعي ان الاب هوه اللي هيتكلم بس لإن هندسي علمتني افترض الافتراضات الغير طبيعيه فهنعتبره ساكت ) والواد مستني الاب والاب مستني الواد



لحد ما الواد اتنحنح عاوز يخلي الاب يتكلم فالاب قال له منور ياابني



وبعدين طبعا بعد المقدمة الطويله بوجودك ياعمي وعامل ايه وازيك ومش عارف ايه والكلام الفاضي بتاع المصريين ده



الاب :: نتكلم بأه في الموضوع ياابني

الواد :: اتفضل حضرتك ياعمي

الاب :: الاسئلة الطبيعيه متخرج من ايه وناوي على ايه والحاجات دي

الابن :: (لو عاوزين نزود الطين بله نقول ان الواد في تجارةبس خلينا نفترض ان هوه في طب)انا متخرج من طب ياعمي بتقدير كويس وناوي اشتغل

الاب:: طيب ياابني بس لازم تكون بتشتغل علشان تفتح بيت

الابن :: ان شاء الله ياعمي

الاب :: طيب ياابني انته جبت شقه وله ابوك هيساعدك وله ايه الوضع

الابن:: لا والله ياعمي مفيش حاجة من اللي حضرتك بتقول عليها دي

(الواد لاحظ ان الاب بدأ يكشر)

الاب :: طيب عندك عربية ياابني وله هتخلي بنتي تركب مواصلات كمان

الابن :: لا مواصلات طبعا ياعمي ( وفخور قوي وهوه بيقولها ) بس لو اتحسنت الحال بعد الجيش طبعا هشتري عربية

الاب :: يعني لسه حضرتك عندك جيش

الابن :: طبعا ده واجب وطني ياعمي

الاب :: طيب ياابني انته جاي ليه

الابن :: علشان بحب بنت حضرتك



الاب طبعا رفض الجوازه دي وادى الواد درس مش هينساه طول عمره ( وبصراحه عنده حق ) والواد قام وقف وراح خد علبة الجاتوه اللي جابها معاه وهوه خارج يأكل منها ابوه وامه ومشي



طبعا القصص دي حقيقيه وبتحصل والله ياجماعه وفي الغالب الواحد مبيبقاش حاطت المواضيع دي في دماغه

وده طبعا غلط



المهم طبعا نقدر نقول كلام نوصف بيه الموضوع ده





حبيبتي



ناديتك يوما كنت وحيد ** وحبي لك بحر مديد ** وفي عينيك أُصبح شريد


أجابني اباك بفقري الشديد ** وعلمت يومها بأني مريض ** وأن دائي فقري العنيد


أكان يجب أن أولد طريد ** وفي الاحزان أحيى خليد ** وتبقين حبيبتي أمل بعيد


حبيبتي لن أحيى رقيد ** وسأحارب لأجلك كفارس صنديد


فهمس عينيك سحر فريد ** ولسحر ابتسامتك يسمو الحضيض ** ورقتك مع الايام تنمو وتزيد


شكرا للي وصل للنفطه دي لإن انا بصراحه تعبت ومش ناوي اقرى البوست واللي يشوف فيه اخطاء يقول منه لله الكيبورد مش منه لله انا لإني مش هراجع عليه


ياجماعه اللي يعرف عنوان للشعر اللي فوق او الخاطرة اللي فوق يقول لي في الكومنت بتاعه
11 Responses
  1. جامد والله يا رزق


    انت حسستنى انى بتفرج على مسلسل



    ساعات الانسان يحب انسانه قوي


    ويتهيألي ان لو هيه بادلته حبه هوه ده اقصى امله ومناه في الدنيا دي

    فعلن فى ناس كتير كدا وبيفتكروا ان الدنيا وردية وبمبى

    ومفيهاش حاجه وحشة

    وللاسف اغلب الناس مش عندها نظرة مبعدية


    وعلى فكرة مش
    هيكون دا بس تصرف الاب


    لا ممكن الواد يتقتل قبل ما يخرج من البيت




    بس اللى بجد تقيل اوى وجااااااااامد

    الشعر

    ايه الفن دا يا ابنى


    أجابني اباك بفقري الشديد ** وعلمت يومها بأني مريض ** وأن دائي فقري العنيد


    الحتة دى حلوة اوى


    وصنديد دى كمان جامده

    ولن احيا دى تحس فيها تحدى اوى


    بس رقتك مع الايام تنمو وتزيد

    دى شايفه انها كانت تبقى حاجه تانيه احسن

    فكر وحاول تغيرها



    اما بقى حركة الجاتوه دى تحس فيها بالنتانه

    بصراحه يعنى

    وفى نفس الوقت الواد عنده وفاء لابوه وامه

    بس انت عارف بجد الانسان فعلن لو مكنش شخص منتج ولا هو هيحترم نفسه ولا اللى حواليه هيحترموه


    بس حقيقى انت واد مبدع

    واسلوبك ممتع

    اى نعم بتطول شوية بس مش مهم

    نستحملك
    ما انت بقيت قدر زى شرى بالظبط

    ولازم نصبر بقى



    واحلى حاجه فيها طبعن انها بالفصحى بس فى نفس الوقت سهل تتفهم

    مش بقلك
    السهل الممتنع

    بردو فى انتظار ابداعاتك وشد حيلك

    العنوان ممكن يكون

    راجع لك اكيد


  2. WhItE HeArT Says:

    شكرا جدا على تشجيعك
    وشكرا على العنوان
    وبصراحه فعلا الحته بتاعة ورقتك مع الايام تنمو وتزيد شايفها نمطيه لحد كبير ومفيهاش جديد في الشعر وانا فعلا بفكر اشيلها بس بفكر احط ايه مكانها لإني للأسف فيا طبع مااشيلش حاجة الا اذا جبت حاجة مكانها في العشر
    يله سلاموتو على رأيك


  3. sahOoOora Says:

    السلام عليكم
    بجد رااااائعة ياا محمد الطريقة اللي عرضت بيها الشعر ولفت نظرنا كمان لمشكلة بتواجه كتير اوى من الشباب فعلا
    ده طبعا غير ان الشعر روووووعة بجد
    تسلم ايديك يا فنان
    ربنا يوفقك ودايما نقرألك اجمل القصائد
    بس انا شايفة ان الحته بتاعتك رقتك مع الايام تنمو وتزيد جميلة جدا ومش نمطيه ولا حاجه بالعكس دي فيها معاني راائعة
    وانا عن نفسي اول ما قرأتها عجبتني اوى
    وبلييز متشلهاش
    وياريت لو تكمل بقى الشعر ده لان هيكون جميل اوى لما يكمل
    سلام


  4. WhItE HeArT Says:

    ميرسي اوي ياسحر على كلامك الرائع وان شاء الله هكمله ومش هشيل الحته بتاعت رقتك مع الايام تنمو وتزيد
    شكرا مرة كمان


  5. سلامو عليكوو

    ازيك يا وايت هارت ؟ ما شاء الله انت بدات تلعلع ايه الابداعات الجامده دى بجد الشعر جامد جدا واسلوبه جميل وميزته انه مش طويل زى القصه انا قريتها اصلن على يومين بس طريقه سرد القصه جميله ربنا يوفقك

    محمد انا كان عندى ليك اقتراح انت ما شاء الله الكلام اللى بتكتبه جامد جدن بس المشكله ان البلوجايه شكلها مش متزبط و انا مقتنعه بان شكل تقديم الاكل له اهميه كبيره لا تقل عن الاكل نفسه فانا راييى انك تحاول تخلى شكل البلوجه احلى من كدا لانى حاسساها ميته مفيهاش حياة يعنى وكمان خط الكلام صغيور

    .
    وبالنسبه لاسم القصيده فانا بقترح انو يبقى حبيبتى لن احيا رقيد

    على فكره عجبنى اوى الكلام اللى انت كاتبه فى بوكس فوق بتاع بضحك وبكشر

    ربنا يوفقك


  6. WhItE HeArT Says:

    شكرا يا(بصراحه اسم غريب قوي اللي انتي حطاه)

    المهم

    انا فعلا موضوع عرض البلوجاية ده في بالي ومنسيتهوش وانا متفق معاكي في طريقة تقديم الاكل لكن والله لو كان الاكل مش حلو وطريقة تقديمه حلوه مش هاكله برضه

    لكن انا ان شاء الله هعدل في البوجاية

    وشكرا جدا على كلامك عن الشعر


  7. kingmody Says:

    احم احم انت عارف طبعا اني غلس يا محمد وبقق على كل حاجة فاستحملني بقة
    اولا ايه حكاية عبد الحليم دي الاغاني حرام يا استاذ محمد فايه الي هيحب واحدة هيروح يسمع اغاني
    ثانيا ايه حكاية لف جناين مصر كلها ده مش اسمو حب ده اسمو قلة ادب يا باشمهندز ازاي يلفو من غير اي ارتباط رسمي بين الاتنين ده اسمو هجص الي بيجي بيجي من الباب مش بينط من الشباك
    ثالثا اشمعنى طب يعني ولا انت اعترفت اخيرا ان طب احسن من هندسة
    رابعا الواحد بعد ما يجي من الباب لازم يبص للتوافق الاجتماعي مش هو عايش في اوضتين ورايح يجوز واده الصالون بتاعها 10×10
    خامسا نيجي للشعر بقة اسمع يا باشمتبهدل
    اولا في عينيك اصبح شريد ... شريد معناها مشرد وهذا المعنى لا يتفق مع البيت المفروض تدور على كلمة بمعنى شارد

    ثانيا الشعر فيه تعدي على القدر بشكل واضح وخاطئ يعني ايه أكان يجب ان اولد طريد وبعدين ازاي طريد طريد يعني مطرود او مطارد بيتهيألي تحط هنا شريد افضل

    ثالثا يعني ايه رقيد في قولك حبيبتي لن احيا رقيد ؟؟ بيتهيألي زهيد افضل

    رابعا من بعت البيت بتاع رقيد انت غيرت الوزن يا باشمهندز

    ........................

    سادسا عفوا يا محمد متخافش بقرالك كل حاجة وياريت تقول اللينك بتاعة البلوجاية بتاعت شريف عشان الواد مدهانيش


  8. WhItE HeArT Says:

    ميرسي اوي يامحمود على ارائك الجميله جدا بالنسبة للموضوع والشعر

    واللي يشوف ردودك يحس ان في تار قديم بيني وبينك

    اولا بالنسبه لقصص الحب والاغاني والحاجات دي فبص ياعم اولا انا بتكلم على اللي بيعملوه معظم شبابنا وشاباتنا ومبيدوش اعتبار لأي حاجة وبعدين مش مش كل اللي بنعمله حلال وياريت بعد كده في ردودك تبص نظرة بعمق شوية للموضوع مش مجرد نظرة سطحية وقرايه سريعه وشوف انا اقصد ايه بموضوع لإني قبل مابكتب حاجة على البلوجايه دي بشوفها هادفه وله لا وانته عارف اني بتكسف من خيالي فمش هنزل حاجة الناس تتريق عليا بيها زي حضرتك

    ثانيا بأه وده الاهم واللي عجبني في الكومنت بتاعك من اوله لأخره رأيك في الشعر يادكتور محمود

    بالنسبة لشريد والنبي بس يادوك تبأه تبص في مختار الصحاح بتاع حضرتك وتقول لي شارد ومشرد وزنهم على وزن فعيل يبأه ايه يادوك وله نقول لك ياسيباويه زي ثانوي


    وبعدين انا اقصد بطريد اللي هيه مطرود زي بذكائك الفذ مااستنتجت ده
    ولو ركزت برده في الشعر زي مااتعودت منك (وانا مش عارف ايه اصلا اللي حصل لك المرة دي ) هتعرف انا اقصد ايه

    اما الحته بتاعة الوزن دي الحاجة الوحيده اللي انته صح فيها مية * مية بس انا حبيت الجمله دي ومش هغيرها واللي سمعوها مني حبوها كده ومش هغيرها مهما حصل

    ثالثاً يادوك محمود يامتثبت باشا (وبرضه هقول لك ابأه شيل مطوة وانته رايح الحتت المعفنه بتاعتك دي تاني) انته عارف ان انا مش اول مرة اكتب شعر او خواطر وانته عارف انا عاوز من اراءك ايه يمكن تكون نسيت اقول لك تاني
    عاوز من اراءك نظرتك الصحيحه للقوافي وللغة مش مجرد عاوز تنرفزني زي ماشامم في ريحة الكومنت بتاعك

    متقلقش هندسة مش هتخليني شمام بس نعمل ايه انته بتعصبني :)


  9. kingmody Says:

    ايه يابني انت نترفذت كده ليه ياض فيه ايه ؟؟؟؟؟؟
    انا مش قصدي حاجة والله !!!!!؟؟
    حكاية الاغاني كنت عارف انك هتقول كده بس قلت استهبل شوية
    اما حكاية التمشية انا لسه مصر مش كل الشباب والشابات ولا حتى معظمهم الي بيكونو فعلا بيبصو على جواز بيلفو جناين مصر كلها قبل ما يكون فيه اي ارتباط رسمي

    حكاية شريد يا محمد شارد متجيش على وزن فعيل !!! ولو بتيجي يبقى هتكون اول مرة اشوفها انا لاجزم بذالك

    حكاية طريد ياريت تفهمني معاناها يمكن اكون مش قادر اوصلو ازاي اكان يجب ان اولد مطرود !!!؟؟

    حكاية المطوة انا مش بشيل الحاجات دي اما حكايت التثبيت انت عارف انت قلتلي ايه لو حصلك ولا اجيب كلامك كوبي بيست :p
    ويا محمد انا والله ما عاوز انرفزك هنرفزك ليه يابني ؟؟؟؟
    انا بقولك الي ملاحظو


  10. WhItE HeArT Says:

    انته ياعم حوده انته عارف انا مش بتنرفز منك اساسا حتى كلامك ولهجتك انا حافظهم ياابني

    المهم بالنسبه لموضوع جناين مصر وبتاع سيبك منه علشان مش موضوعنا

    انا بالنسبه لموضوع شريد فشيء طبيعي انها ممكن تيجي على وزن فعيل بما انها رباعيه معتلة الوسط المهم برضه ده مش موضوعنا لإن الاختلاف في الرأي لايفسد من الشعر قضيه

    اما موضوع يجب او اولد مطرود ده مش معناه ان اني قصدي انه اتولد مطرود من بطن مامته يعني موصلتش للغباء ده انا اللي اقصده ان من اول مااتولد وحياته كلها طرد وبهدله علشان كده هوه فقير

    انا كده شرحتلك وجهة نظري ياحوده ووالله انا مش بتضايق منك انته اللي باين عليك نسيتني ياعم

    وموضوع المطوة انا قصدي للأمان بس مش اكتر اما الكلام الكوبي بيست انا ممكن اقوله عادي كل اللي بيدخلو هنا انا اعرفهم والحمد لله البلوجايه لسه منتشرتش وممكن امسح الكومنت بتاعك
    (وش ومطلع لسانه):)


  11. kingmody Says:

    هههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
    ده تعليقي

    ( وش مطلع لسانو ) = :p