وصايا ماقبل الموت




ياجماعه ياللي عاوزين تقرولي انا عارف ان البوست ده هيبأه تقيل عليكم قوي قوي وانا هلتزم بقول الناس لازم تقصر علشان كده انا مش هكتب موضوع وهلتزم بقول صاحبي لازم تورينا الحزين بس اللي عاوز اقوله ان الشعر ده فيه ورا الكلام كلام وكان عندي افكار اضيفها ياما للشعر ده بس مقدرتش بصراحه لإنكم متتصوروش وانا بكتبه قلبي كان بيتنفض ازاي وبأمانه في مرات كتير كنت همسك الورقه واقطعها بس في الاخر تصعب عليا نفسي






عموما انا هقول الشعر وارجوا اي حد يدخل مش يدخل يقرا وخلاص انا عاوز اعرف ارائكم لإن انا وريته لناس قالو حلو وناس قالو كئيب جدا ولازم يتقطع وبصراحه انا مكنتش عاوز انزله على البلوجايه بس ده اللي حصل



عموما نبدأ






أخر حوار او نقدر نقول وصايا ماقبل الموت

-------------------------------------

وهمست حبيبتي


رقة قولها تبكيني في انهيار....... وما أغبى العين ماأبكاها



تنظر حبيبتي بانكسار....... تحاورني أميرتي بعيناها



تحاورني لكنه اخر حوار....... تحاورني مرتعشة يداها



"حبيبي بيننا عشق دار....... ودموعي داء انت دواها"



"سأتركك حبيبي في مرار....... حبيبتك يجب ان تنساها"



"واريدك دوماً في انتصار....... جنتك نفسك يجب رضاها"



"لا تكن حبيبي مثل البحار..... موجة تغضب لمداعبة هواها"



" فا اقطف حبيبي احلى الثمار..... وابحث لنفسك عن سماها"



وفجأة توقف بيننا الحوار....... واقتربت يدي تغلق جفناها



رحلت في نعش تحت الغبار....... كم تشتاق روحي للقياها



رحلت وتركت ليا الدار....... وتركت لقلبي روحها وهواها



رحيلها يذيقني حقاً مرار....... حبيبتي عشقي لن انساها


-----------------------------------------------------------

ياجماعه انا بجد عاوز اقول ان اي حد قرأ الشعر وتوهم انه فهمه ده مش حقيقي لإن للأسف محدش هيفهم الكلام اللي وراه غيري انا


عموما انا مستني اشوف ارائكم وخصوصا رأيك يامحمود لإني في اوزان وقوافي ضاعت مني والشعر محتاج شوية تظبيط وانا بصراحه وبكل امانه متأثر جدا بيه ومش قادر اعدل فيه حاجة

Comments

kingmody said…
انا مش هتوهم اني فاهمو ولا حاجة ومنتتظر اني اعرف منك يعني دي هتبقى تاني حاجة عاوز اعرفها منك
انا هكلمك عن الشعر اولا الي مكتوب بالاحمر هو اجمل جزء من الناحية الشعرية وهو اكتر جزء مؤثر الجزء الي قبليه بايظ خالص وتقيل
الجزء الي بعديه الي ممتاز فيه دول
رحلت في نعش تحت الغبار....... كم تشتاق روحي للقياها


رحلت وتركت ليا الدار....... وتركت لقلبي روحها وهواها

ودي بالنسبالي اجمل ما انت كتبتو يا محمد
وبالذات التجانس انك ختمت صدور كل الابيات بنفس القافية

بجد القصيدة جامدة

بس ملحوظة اخيرة وخدها من اخوك يا محمد
مفيش حاجة في الدنيا دي كلها تستاهل انك تهون عليك نفسك بسببها او انك تدمع دمعة واحدة بس
دي حتى اسمها دنيا يعني من الدنو يعني بالعامي كده ومعلش على اللفظ يا جماعة دنيا = واطية
ومتهيأليش محمد اخويا يعيط او يدمع او تهون عليه نفسو من حاجة واطية او اي حاجة جوا الحاجة الواطية دي
ولا ايه يا محمد باشا
WhItE HeArT said…
شكرا جدا يامحمود على لاكم الجميل ده بس انا عاوز منك تحاول تعدل الجزء الاولاني
وبعدين القصيده دي بجد بتأثر فيا لإن الكلام اللي بالاحمر كل جمله والله يامحمود وراها بلاوي فتخيلت المويقف في دماغي اساسا واتأثرت بيه قوي

اما بالنسبة لأجمل ماانا كتبته انته شايف دي وانا شايف اجيبيني حبيبتي وممكن ناس لايعجبها دي ولادي المهم انها عجبتك وبفعلا دي حاجة مفرحه جدا

اما بالنسبه اني احكيلك اللي وراها فدا كلام شرحه يطول وانا الليله مشغول بيني وبينك هبأه اقول لك
يله سلام
سلامو عليكو

وأولا بجد الكلام يحطك في حاله من الشجن
وبما ان الشاعر قدر يوصل حاله الشجن دي
يبقي نجح في مهمته


ما علينا بما وراء الكلام من حقك تحتفظ بيه لنفسك
ودا لا يقلل من قيمة كلامك

كمل ومش مهم يكون شعرك موزون ومقفي بشكل كامل
دي حاجة بتيجي مع الوقت


ركز علي حفظ الشعر القديم
واشتري كتب عروض
هتفيدك
وممكن ابعتلك مع الواد صاحبك شويه كتب حلوة

بس الاول
تفرحوني انتو الثلاثة بنجاح
وتفوق باهر


مع السلامه
وخلي بالك من نفسك ومن شريف وسلم علي اختك كتير
WhItE HeArT said…
شكرا على كلامك يارفيده

وفعلا موضوع الشعر القديم ده مفيد جدا وبجد انا قبل مااقرا فييه اي كلام مكنتش بعرف اكتب جمله لكن المهم
شكرا على الكلام وشكرا على الكتب مقدما انا قلت لشريف يجيبهم

وان شاء الله هيبأه في نجاح لكن بالنسبالي انسي موضوع الحج باهر علشان الدكاترة مهيبرين على الاخر

وان شاء الله سلامك يوصل وهخلي من شريف
ايه الجمال دا يا وايت


بس بجد البوست دا خلاها دارك على الاخر


الكلام رائع واحساسك عالى اوى

وماشى يا عم مش مهم نفهم

اهم حاجه تكون انت فاهم ودا حقك طبعن


وانت بتقرأ تحس انك شايف المنظر ادامك

ودا طبعن شطارة من الشاعر القدير

شد حيلك وفى تقدم واضح

ربنا معاك

وبجد يكفيك ان احساسك صادق وواصل

يلا سلاموتو
WhItE HeArT said…
قبل مااروح كده الامتحان تخليني اشوف الرد الجميل ده

المشكلة ان لو الواحد حاسس انه هيروح يبدع في الامتحان كان راح وهوه مطمن

ما علينا

المهم شكرا على الكومنت الجميل ده وبالنسبه للكلام والله مااقصد حاجة بس انا كاتب حاجة لنفسي

يعني االشعر ده انا اقراه اشوفه موضوع كاتبه لنفسي وانتم تقروه تفكروه قصة واحده بتموت قدام حبيبها
فعلشان كده انا بقول ان محدش هيقدر يفهم قصده الحقيقي غيري انا

عموما شكرا يازينب واقوم انا بأه اتشيك علشان رايح الحفله بتاعت كليتنا

سلام
BoTaNesToKeeSoo said…
ايـــــــه دا كله ايه دا كله

فى ايه يا عم الحبييب ايه الشحتفه دى كلها دا انت مش وايت هارت دا انت احمر واحمر اوى كمان

بعيدا عن ان البوست ده اثار فضولى بشكل ملوش حل بس هو بجد جامد جدا

واحساسه عالى وواصل وكمان انت كاتبه بشكل قصصى فوق الفظيع وبجد فى تعبيرات قويه كتييره خلتنى ادمع


ما اغبى العين ما ابكاها


دموعى داء وانت دواها

ابحث لنفسك عن سماها الجمله دى خطيره

حبيبتك يجب ان تنساها
وحبيبتى عشقى لن انساها

ربنا معاك والله جامده اوى اوى

على فكره انا كتبت بوست جديد ومستنيه اشوف وجههة نظرك فى الموضوع اللى انا متكلمه عنه


شد حيلك فى الدراسه وربنا معانا كلنا

البلوجه كدا بقى شكلها احلى بالافتكاسات الجديده

اخيرا غيرت صورتك بتاعه المنتديات دى
BoTaNesToKeeSoo said…
نسيت اقوللك انها بتفكنى باغنية هانى شاكر بتاعه راحو البيت الصغير
WhItE HeArT said…
شكرا جدا على ردك فوق الرائع ده ""برضه اسمك غريب مش عاجبني" وموضوع الشعر فده الحمد لله لإني كنت عاوز اعمل فيها حاجة لكن انا هقول لك لإن في ناس كتير طلبوا اني اقول لهم ايه اللي ورا الشعر ده انا مش بكلم فيه حبيبتي لإن حبيبتي في الشعر ده هيه روحي انا وبتكلم وبوصف فيها ان روحي بتموت مني بس بطريقه مصورة متبينش الحاجة ده
لكن والله مافيها شحتفه ولا حاجة لإني مبحبش الشحتفه اساسا

وبالنسبه للأحمر والله مافاهم ايه معنى الاحمر ده لكن مش مشكلة

وكويس فعلا انك اخدتي بالك من موضوع


حبيبتك يجب ان تنساها
وحبيبتى عشقى لن انساها

لإن البيتين دول انا كاتبهم بنفس نهاية الكلمات تماما وفيها معاكسة بين كلام الحبيبة وكلام الحبيب وكويس ان عندك قوة ملاحظة كنت متصور محدش هياخد باله منها

وبالنسبة للبوست بتاعك انا رايح اشوفه دلوقتي مهو خلاص خلصنا الامتحانات ونص فضينا

سلام
كدا بقى معناها اصعب يا محمد؟

ليه دا كله يابنى؟

بس بجد جامد


شد حيلك فى الابداعات

بس الدراسة اهم

عملت ايه فى الايكزامز؟؟؟

عرفاك شطور

ربنا معاكم


سلاموتو
WhItE HeArT said…
شكرا يا الكائنة النورانيه على مدحك ومتقلقيش ده مش حزن بس زعل بسيط من الناس ده لو كان زعل شديد ده انا كنت كسرت الدنيا

اما بالنسبة للامتحانات فبجد يعني انا مقدرش اقول حلو وله وحش لكن لو هما كانو عاوزينا نحل كل الاسئلة فيبأه انا حليت وحش ووحش قوي كمان
لكن لو مش عاوزينا نحل كل الاسئلة وده الطبيعي والطبيعي كداً في كليتنا فممكن اكون حالل المتوسط او اللي ينجحني ان شاء الله

وياري بجد تدعولنا لإننا دخلنا سنة جديده وحياة جديده غريبة علينا
BoTaNesToKeeSoo said…
ياااااااااه

بتودع نفسك؟ امال انت عايش الوقتى ازاى

يارب تكون لقيت روحك الوقتى ولو مكنتش لسه لقيتها ربنا معاك وتلاقيها بس اهم حاجه ماتبطلش بحث عنها

اما بالنسبه لقوة الملاحظه فدا النورمال بتاعى وانا اصلن قلت ياترى هو قاصد ولا جت معاه بالصدفه بس لقيتك اروبه وقاصدها مش بقللك انت مبدع

وبعدين انت مش فاهم ايه فى احمر؟؟ انا قصدى احمر يعنى عندك دم وقلبك بينبض يا زيكوو وفعلن بما انك كاتب القصيده لنفسك فهى مش فيها شحتفه ودا يحليها اكتر لانى انا كمان بكره الشحتفه

وبشكرك على كومنتتك اللى عملته عندى وانا ان شاء الله هرد عليه هناك


اما بقى حكاية اسمى ان اغيره فدا مستحيل لان دى وظيفتى ومحدش بيغير وظيفته عشان خاطر حد وخصوصا لو كان الحد ده صاحب شريف والذات انت يا محمد

مش كده بردو

Popular posts from this blog

الحب بات ... مصنوع من قهر السكات

تساؤلات

ساعد نفسك