أجيبيني حبيبتي


!! حبيبتي

كلمة عندما اقولها تكونين سكنتي فؤادي ملكتي عواطفي

عندما اقولها يصحو الحب و يرقص القلب وينهار فيا الصبر


!! ماذا اقول لك حبيبتي

أقول ان رؤياكي تشفيني وان بعينيك تسحريني وانك دوماً تهزميني

اقول بأنك حبي الوحيد وصبري المديد وأني معك أكون سعيد


!! كيف اقاوم هواك حبيبتي

عيناك قمرليا في ظلامي صوتك غناء ليا في ضجري قلبك قصر ليا عند طردي

سعادتك حلم أحلم به وهواك واقع احيى فيه ولقائك عشق اسعى اليه




ساعات الحب بيبأه مجرد نزوة وهتعدي وده مش ساعات ده غالباً وبيكون الواحد حاسس بكده

بس دوما خوفه ان ده ممكن يكون حب فعلا ويقول لعقله (( لا ياعم ده انا حتى بخاف عليها)) ده مش معناه ان ده حب
الانسان دوما مع العشرة بيخاف على اللي بيعاشره حتى لو مكنش حد في باله (( ده طبعا مش في مصر)) فما بالك حد في باله


الخلاصه ان لازم الانسان يتأنى في موضوع الحب ده جدا ومش اي نزوة خلاص بقت حب والانسان هيموت لو الحب ده فشل



طيب وساعات الحب بيكون حب حقيقي فعلا وده غالبا بيكون شعور عمر الواحد ماحسه قبل كده
لدرجة انه بيشوف حبيبته ومش بيشوف حد حوليها حتى في وسط الزحمه
بيشوفها من هنا وبيحلم من هنا ((مش بيحلم معناه انه بينام وبيحلم لا معناه ان من توهته كإنه بيحلم ..... ركزوا شوية)) وبيحس ان قلبه بيدق بمعدل فوق الطبيعي وان من قوة دقته بترجه رج
وياعيني بأه لو كلمته كمان بيبأه هيعيط خلاص قدامها اما لو ضحكتله فهوه بيعيط فعلا وبيتمنى الارض لو تتشق وتبلعه
وده غالبا نادر في حياتنا اللي احنا عايشينها لكن احنا عايشين علشان نأمل وده حالنا احنا المصريين اكتر من غيرنا

بنأمل الحب وبنأمل نعيش في سعاده وبنأمل حال بلدنا يتغير ونحس بالنظافه مرة بأه

نفسنا الدولة تطلع قرار بسفلتة الشوارع كلها سفلته نظيفه و جاربج نحط فيها الزباله في كل حتة زي البلاد النظيفه وتطلع لنا قرار ان جميع العربيات المصنعه قبل سنة 99 متشتغلش تاني واصحابها ياخدوا تعويض (( والله ساعتها هكون اول واحد رامي عربيته )) ويقولوا ان اللي كان عايش على تاكسي هيشغلوه في هيئة النقل العام بعد ماتنضف ويبأه ليها خط سير محدد وينظفوا السواقين ويبأه ليها محطات نظيفه وعربيات نظيفه وأوقات تعدي فيها زي أي دوله محترمة في العالم نفسنا ندخل الاتوبيس نلاقي الماكينة اللي بتاخد الفلوس اوتوماتك وتطلع لك التذكرة زي اي بلد محترمه برده نفسنا ياخدوا العلماء في الهندسة ويفتحولهم مصانع وقولولهم طلباتكم اوامر من الرئيس شخصيا زي ماعمل رئيس دوله مش فاكرها والله ساعتها الناس دول هيبدعوا مش بعيد يطلعوا عربيات احسن من شركة بي ام دبليو لإن دماغ المصريين عالية والله بس محدش حاسس بيها نفسنا يفتحوا مستشفيات للدكاترة نظيفه و تكنولوجيا عالية ويدو الدكاترة حقهم علشان ميطلعوش يسرقوا بره (( وبمناسبة السرقه نفسنا السارق فعلا تقطع ايده علشان ميسرقش تاني بأه)) نفسنا المدرسين يعلمو في المدرسة مش في البيوت بأه وده مش هيحصل غير لما ياخدوا حقهم الطبيعي اللي يعيشهم بيه والمدارس تكون نظيفه


الحاجات دي سهله والله لكن نقول ايه بأه منهم لله
وجت ايام قالوا عليها انتخابيه
قلت طبعا بلدنا دي ديموقراطية
واتاري ملناش حق في البلد ديه
وقالوا اللي هينافق ملهوش عندنا ديه
دمت يابلدي عزيزة مصرية عربية

لا ذهبيه ولا برونزية خلاص مصر العشرومية
اللي مسكوكي يابلد عالم مفترية
لكن مش هنتكلم مع العالم البلطجيه
واخرنا نغني تحت السجر وناكل اكله هنية
وفي الاخر نتلب على قفانا ودي احلى هدية

طبعا الكلام ده مقتبس (مش مقتبس انا كاتبه علشان انرفز شريف على اللي بيعمله فيا وانا بعتبرها اقتباس او سرقه للفكر بتاع الخماسيات علشان كده انا حاولت احرف فيها شوية لكن يستاهل) ومعلش ياشريف امشي على اخر جملتين في الخماسية
انا خرجت بره الموضوع لكن بجد حال بلدنا مؤسف جدا جدا

والحل سهل وكل يوم بنستنا جديد ومفيش جديد


عموما انا هقول بأه الشعر الطبيعي ليا في اي بوست بس قبل مااقوله احب اقول اني للأسف هتغيب لفترة لإني داخل على امتحانات وادعولي





أجيبيني حبيبتي


حبيبتي عندما احسست بطيفك ... تحرك القلب يسابق خُطاكِ


كنت اسمع صمتك وهمسك ... أهتف حبيبتي أعشق سناكِ


وكنت أقاتل لأكسب وِدُكِ ... وكأن همومي أمست رضاكِ


صرخت وتَغَنّيت بقولي أحبك ... وليت صراخي تسمعه سماكِ


أرسلت مراسيلي تناشد قلبك ... أغازل الحور في عيناكِ


وأجبت بغموض هوه صمتكِ ... أأعلم اني سلبت هواكِ


أم اكتب النهاية بقلمك ... ويكون موت قلبي فداكِ


دنياي عذاب في بعدكِ ... وأتمنى الهلاك بين يداكِ


فأتسحريني بُحُبكِ كعادة كرمكِ ... أم ينهار حبي دون لقاكِ


5 Responses
  1. kingmody Says:

    الشعر انت عارف رايي فيه يا محمد انو جامد جامد جامد وما شاء الله في تطوير اشطة ياعم الباشمهندز وركز في مزاكرتك وامتحاناتك عاوز اسمع حاجات حلوة
    اما الموضوع فشكلك ملكش في الاخبار المحلية
    ياباشا انت مسمعتش الاخر الاخبار
    " لقد تم تعديل الدستور ولقد تم تعديل قانون الارهاب الى قانون الطوارئ"
    واشطة اظبط نفسك يابني العيش والحلاوة الايامدي غالية وانا مش بحب اشتريها
    اكيد فاهمني ;)


  2. WhItE HeArT Says:

    شكراً جدا يامحمود على الكلام الجميل ده

    وشكرا برضه على موضوع العيش والحلاوة ومتقلقش عليا يادكتور خليك بس في الحرامية اللي ثبتوك يافتك

    شكراً مرة تانية


  3. WhItE HeArT Says:

    اه ياجماعه
    اللي عاوز بجد يسمع شعر جميل يدخل على البلوجايه بتاعت محمود


  4. ايه دا يا هندسة

    ايه اللى دخل الحب فى مشاكل مصر

    ولا انت شكلك بتحب مصر؟

    فى ايه يابنى


    الحتة الى فى النص دى كان مكانها بوست لوحده

    مش عارفه ايه لعب العيال اللى وقعنا فيه ده


    يا بنى ركز شوية

    هو الكلام كله حلو بس انت لخبطتنى بجد

    وبعدين انت مالك ومال السياسة

    ما دمت تأمل السعادة والحياة

    يبقى شيل السياسة من دماغك خالص

    وكل حاجه وليها ناسها

    والا انا ممكن ابلغ عنك اكرامن لشريف

    اصلى بعزه

    بس انا هصبر عليك شوية عشان خطرك

    وانا مع الكنج فى موضوع العيش والحلاوة

    حاول تظبط نفسك

    اما بقى بالنسبة لتطويل اللسان فى البلوجات

    فعندنا فى طب بيعلمونا ازاى نقطع اللسان من النص

    واخد بالك

    ارحم نفسك منى

    اوك

    واعتبر دا تهديد

    شد حيلك فى الامتحانات وحاول توفق فى وقتك وبلاش تتغيب لاننا هنفتقدك

    ربنا معاك

    وخلى بالك من صاحبك(حسبى الله

    ولا بلاش الواد مش ناقص

    فى انتظار مزيد من ابداعاتك بس اختصر شوية عشان خطرى

    سلاموتو


  5. WhItE HeArT Says:

    ميرسي على ردك الجميل المفيد ده

    بس والله وبقول لك بجد انا كنت داخل ومش في دماغي الحته بتاعت السياسه دي خالص وفجأه لقيت نفسي اتفتحت وطلعت المكتوب جوه قلبي وبعدين الحته بتاعة الخماسية دي انا قلت لشريف قبل كده ياخدها ويكتبها عنده بس هوه موافقش فجت في بالي كتبتها ده حتى اول جزء من الكلام بتاعة حبيبتي كلمة ........كتبتها وانا على النت ومش في بالي اني اكتبها اساسا على فكره انا لما ببأه بكتب حاجة بحبها ببأه فرحان بيها جدا وممكن ابدع فيها ولإن الشعر ده احلى شعر انا كاتبه فحابه جدا

    خلاص بأه لإن شريف بيقول عليا مش بذاكر وميعرفش ان انا متبهدل وان بابا نزل خلصلي المنهج ورجع تاني

    وبيقول لي بدخل على النت كتير وبصراحه دي حقيقه مقدرش انكرها لكن انا حياتي محصورة في اوضتي بين كتبي وكومبيوتري وانا الدي اس ال مفتوح على طول فبنط كل ساعتين على الجهاز اشوف مين الموجود وادخل المنتديات واجرب برامج ومش عارف ايه وارجع تاني

    عموما مش موضوعنا بالنسبه للسياسه انا مش هتكلم فيها تاني كانت حته وطلعت مني مش هتتكرر انا مش قد القفا الحكومي

    وبالنسبه للتطويل فعادي مهو انتي ذلتيني في اخر بوست ليكي

    وبالنسبه للي بيعلموكم دول فااحسن حل لقطع اللسان سكينه وبإيدك وصلي على رسول الله واقطعي مش محتاجه دراسه عم حسن الخرفانجي بيقطع راس الخروف مش هيقطع لسان اي حد

    وبعدين تهديدك مقبول بس متنسيش ان بتوع هندسة هما اللي اخترعوا قنبله وفكرتها بندرسها وفكرتها سهله فمتقفيش قدامي ربنا يهديكي


    انا اللي بهدد بأه "لو ليكي في الغلاسه من بعيد لبعيد فبلاش المجال ده والنبي قصادي "

    وشريف انا هقتله واخلكم منه

    افتكر الكومنت ده اطول من البوست وشريف هيقضيها تريقه عليا لو شافه

    هبأه امسحه بعدين

    سلام