الحب بات ... مصنوع من قهر السكات

متقوليش

الحب كان ماضي وراح

وان من عادتي السماح

وهوه كان فين البراح؟

وجرح قلبي بات مباح

ومشاعر الروح تستباح

والحب فين يروح

ولمين الشوق يبوح

وقلب مين مجروح؟

ده قلب كان قلبك

.

بعطره بشتاقلك

باسمه بندهلك

وبحبه كان نهلك

وبتطلبي ان انسى زمان

واقتل حب كان كيان؟؟

في ليل جريح

بات مريح

اصبح طريح!!؟؟

اصبح ضريح!!؟؟

.

وبدون معاد

الحب يتحول رماد

والهوى في زمنه يُقاد

وبظلم مين آن الآوان

اني اقتل الشوق الـ كان

اني اجرح القلب المهان

اني اعقد الروح ف الزمان

وده امر مين؟

انسى الغرام

والمغرمين

انسى احلام

العاشقين

مكتوب

حياتي تكون صراع

مع حبيب لازم يطاع

والحب سلعة بقت تباع

والغدر فيه اشهى الطباع

فمتنسينش اني حبيبك

الغدر دايرة من ايدينك

هتلف اكيد بيني وبينك

وهييجي من يجرح حنينك

وتفتكري من ضاع بإيدك

بس انسي انه يطير يجيلك

وافتكري يومها الذكريات

وافتكري ان الحب بات

مصنوع من قهر السكات

---------------------------------------------------------

عاجباني اوي كلمة قهر السكات دي معرفش انا جبتها منين بجد فجأه لقيتها في الورقه فطبعا محدش يسألني معناها

المهم انا دي من المرات القليله اللي اكتب حاجة واحبها قوي كده افتكر اخر حاجة كانت سلام وده كان اخر بوست ليا السنة اللي فاتت

وده ان شاء الله هيكون اخر بوست ليا قبل النتيجه ادعولي علشان انا بجد خلاص بدعي ربنا يرحم اعصابي

دمتم على خير واكيد هبلغكم لما النتيجه تطلع دعواتكم